Diaspor

Diaspor

Dünya Azərbaycanlı Gənclərin I Konqresinin proqramı açıqlanıb

22 noyabr 2010 12:17 (UTC +04:00)

Bakı. Laçın Sultanova – APA. Noyabrın 27-28-də Almaniyanın Frankfurt şəhərində keçiriləcək Dünya Azərbaycanlı Gənclərin I Konqresinə hazırlıqlar başa çatmaq üzrədir. Bu barədə APA-ya Diasporla İş üzrə Dövlət Komitəsinin mətbuat xidmətindən məlumat verilib. Diasporla İş üzrə Dövlət Komitəsinin Gənclər və İdman Nazirliyi ilə birgə təşkil etdiyi tədbirdə Prezident Administrasiyası ictimai-siyasi şöbəsinin müdiri Əli Həsənovun, Diasporla İş üzrə Dövlət Komitəsinin sədri Nazim İbrahimovun, gənclər və idman naziri Azad Rəhimovun, millət vəkillərinin, Nazirlər Kabineti əməkdaşının, Azərbaycanın Rusiya, Fransa, Avstriya, Almaniya, Böyük Britaniya, İsveçrə və Türkiyədəki səfirlərinin, Avropa Şurası, TürkPA, İKT Gənclər Forumundakı nümayəndələrin, İnsan Hüquqları üzrə Avropa Məhkəməsi təmsilçilərinin iştirakı gözlənilir.

Konqresə dünyanın müxtəlif ölkələrindən 115 azərbaycanlı gənc, təxminən 40 diaspor təşkilatının rəhbərləri, Azərbaycanda fəaliyyət göstərən bir sıra gənclər təşkilatlarının rəhbərləri, eləcə də xaricdə təhsil alan tələbələr, o cümlədən Almaniyada təhsil alan 40-dək azərbaycanlı tələbə və KİV nümayəndələri qatılacaq. Bununla yanaşı konqresə Rusiyanın Azərbaycanlı Gənclər Təşkilatının (AMOR) boyük nümayəndə heyəti ilə qatılması nəzərdə tutulub.

Dünya Azərbaycanlı Gənclərinin I Konqresinin təşkili xarici ölkələrdə yaşayan azərbaycanlı gənclərin diaspor quruculuğu işinə cəlb olunması, ictimai-siyasi fəallığının artırılması, tarixi Vətənlə əlaqələrinin möhkəmləndirilməsi məqsədinə xidmət edir.

«Azərbaycan həqiqətlərinin təbliği və diaspor quruculuğunda gəncliyin rolu» adlı ilk panelin aparıcısı Azərbaycan Gənclər Təşkilatları Milli Şurasının sədri, Milli Məclisin deputatı Fuad Muradov olacaq.

Dialoq və Əməkdaşlıq Uğrunda İslam Konfransı Gənclər Forumunun baş katibi Elşad İskəndərovun aparacağı ikinci panel isə «Mədəniyyətlərarasi dialoqun inkişafinda gəncliyin rolu» adlanacaq. Burada «Xocalıya ədalət» beynəlxalq kampaniyası haqqında da ətraflı məlumat veriləcək.

Konqresin üçüncü paneli «Xaricdə yaşayan azərbaycanlı gənclərin cəmiyyətə inteqrasiyasi» adlanacaq.

“İrəli” İctimai Birliyinin sədri Ceyhun Osmanlının aparıcılıq edəcəyi «İnsan Hüquq və azadlıqlarının müdafiəsi gənclər təşkilatlarının fəaliyyətində» adlı sonuncu paneldə isə «Xaricdə yaşayan azərbaycanlıların hüquq və azadlıqlarının qorunması sahəsində gənclər təşkilatlarının rolu», «Ermənistanın Azərbaycana təcavüzü nəticəsində azərbaycanlıların məruz qaldığı hüquq pozuntuları hallarının beynəlxalq məhkəmələrə çıxarılması perspektivi gənclər təşkilatının fəaliyyətinin prioritet istiqamətlərindən biri kimi», «Azərbaycanlı gənclər təşkilatlarının insan hüquqlarının qorunması sahəsində fəaliyyət göstərən beynəlxalq təşkilatlarla əlaqələrinin qurulması və inkişaf etdirilməsi perspektivləri», «Vətəndaş cəmiyyətinin formalaşdırılmasında gənclər təşkilatlarının rolu» mövzularında məruzələr təqdim olunacaq.

Tədbirdə, həmçinin Dünya Azərbaycanlı Gənclər Birliyinin (UWAY- The Union of World Azerbaijani Youth) yaradılması ideyası müzakirə ediləcək. Konqresin sonunda yekun sənədlər qəbul olunacaq.