Diaspor

Diaspor

Frankfurtda Dünya Azərbaycanlı Gənclərinin I Konqresi keçirilir

27 noyabr 2010 13:07 (UTC +04:00)

O bildirib ki, tədbirdə iştirak etmək üçün Azərbaycandan 41 gənclər təşkilatının nümayəndəsi, 23 ölkədə təhsil alan və çalışan 131 gənclər təşkilatının təmsilçisi, 25 ölkədən 41 diaspor təşkilatının rəhbəri, Rusiya Azərbaycanlı Gənclər (AMOR) təşkilatını təmsil edən 23 nəfər qatılıb. Qonaq qismində tədbirdə Prezident Administrasiyasının ictimai-siyasi şöbəsinin müdiri Əli Həsənov, bir sıra dövlət qurumlarının nümayəndələri, Azərbaycanın Avropanın bir sıra ölkələrindəki səfirləri, Türkiyənin Frankfurtdakı baş konsulu İlhan Sayqılı iştirak edir.

AMOR-un sədri Leyla Əliyevanın təbrik məktubunu qurumun icraçı direktoru Emin Hacıyev oxuyub, konqresdə Dünya Azərbaycan Gənclərinin Birliyinin yaradılması ideyasını alqışlayıb.

Türkiyənin baş konsulu İlhan Sayqılı Türkiyə-Azərbaycan dostluğu barədə danışıb, çıxışını «Türkiyə ilə Azərbaycan bir ürək, bir candır» sözləri ilə bitirib.

Azərbaycanın Almaniyadakı səfiri Pərviz Şahbazov gənclərə bütün məsələlərdə yardımçı olmaq barədə Azərbaycan rəhbərliyindən tapşırıq aldıqlarını və bu istiqamətdə hər bir yardımı etməyə hazır olduqlarını deyib.

Konqres iştirakçıları qarşısında təbrik sözü ilə TürkPA-nın baş katibi Ramil Həsənov, İslam Konfransı Təşkilatı Gənclər Forumunun baş katibi Elşad İsgəndərov, idman və gənclər naziri Azad Rəhimov çıxış ediblər. A.Rəhimov bildirib ki, son 5 ildə 350-dən artıq layihənin dəstəyi üçün dövlət büdcəsindən 4 mln. manata yaxın vəsait ayrılıb. Nazirin sözlərinə görə, Azərbaycan gəncləri 30-a yaxın beynəlxalq təşkilatda təmsil olunur.

Ə.Həsənov isə Azərbaycan prezidenti İlham Əliyev və Prezident Administrasiyası adından toplantı iştirakçılarını salamlayıb və bildirib ki, dünyada hər zaman gənclərlə bağlı məqsədyönlü siyasət həyata keçirilib. Ə.Həsənovun fikrincə, öz gələcək estafetinin verilməsi üçün kadrlar hazırlamayan dövlətin gələcəyi yoxdur: «Bugünkü tədbir çox aktual bir məsələ üzərində, dünya siyasətinin əsası olan gənclər siyasəti üzərində qurulub. Gənclik müxtəlif siyasi istiqamətləri öz üzərində cəmləşdirən bir qanaddır. Gənclər siyasəti bütün dövlətlərin onurğa sümüyünü təşkil edir. Sizin gücünüz, intellektiniz – dövlətin gücü və intellektidir. Azərbaycançılığın dəyərini ən gözəl xaricdə yaşayan azərbaycanlı gənclər təbliğ edə bilər».

Dağlıq Qarabağ problemindən danışan Ə.Həsənov vurğulayıb ki, Azərbaycan son 100 ildə 3 dəfə ermənilərlə bağlı problem yaşayıb. «Dünya azərbaycanlıları heç vaxt unutmamalıdır ki, əsas vəzifə özümüzə dost tapmaqdır. Nə qədər güclü olsaz, dəyərli bir faktora çevirilsəz, bir o qədər də vətənə xeyir vermiş olarsız. Tək başına dünyada heç nəyə nail olmaq mümkün deyil», - deyən Ə.Həsənov Azərbaycan və Türkiyə diasporlarının birgə fəaliyyətinin əhəmiyyətini xüsusi qeyd edib: «Azərbaycan gəncliyini sağlam, milli, bəşəri dəyərlərə yiyələn kimi formalaşdırmaq Azərbaycan siyasətinin prioritetlərindən biridir».

Qeyd edək ki, konqres «Azərbaycan həqiqətlərinin təbliği və diaspor quruculuğunda gəncliyin rolu», «Mədəniyyətlərarası dialoqun inkişafında gənclərin rolu», «Xaricdə yaşayan azərbaycanlı gənclərin cəmiyyətə inteqrasiyası» və «İnsan hüquq və azadlıqlarının müdafiəsi gənclər təşkilatlarının fəaliyyətində» adlı panellərdə davam edir.