Diaspor

Diaspor

Gürcüstan Azərbaycanlıları Konqresinə yeni sədr seçilib

27 noyabr 2010 14:21 (UTC +04:00)

APA-nın Gürcüstan bürosunun məlumatına görə, qurultayda 280 nəfər nümayəndə və 4 nəfər konqres təsisçisi iştirak edib. Konqresin sədri Əli Babayev isə Almaniyaya səfəri (Frankfurtda keçirilən Dünya Azərbaycanlı Gənclərin I Konqresi) ilə bağlı toplantıda iştirak etməyib.

Tədbiri qurultayın Təşkilat Komitəsinin sədri, konqresin təsisçilərindən olan Kamil Əliyev açaraq qurultayın gündəliyi barədə məlumat verib. Sonra konqresin təsisçilərindən Gülgəz Əliyeva, Ələddin Qarabağlı və Ramiz Bəkirov çıxış edərək son bir neçə ildə GAK-ın gördüyü işlər və qeydə alınmış maliyyə pozuntularından söz açıblar.

Təsisçilərdən sonra qurultay nümayəndələrinə söz verilib. Bolnisi rayonundan gələn Mühəqqər Əliyev təsisçilərin də konqresin apardığı işlərdə günahının olduğunu bildirərək qeyd edib ki, GAK sədri Ə.Babayevin iştirakı olmadan qurultayın keçirilməsi düzgün deyil: «Təsisçilər öz aralarında pulları bölə bilməyiblər, ona görə də sədrdən narazıdırlar».

Gürcüstan parlamentinin deputatı Ramin Bayramov da GAK sədri Ə.Babayevin Qardabanidə heç bir tədbir və layihə həyata keçirmədiyini qeyd edib: «Mən şəxsən Əli Babayev haqqında söz demək istəmirəm. Mən kimləri qovmuşamsa, gedib Əli Babayevə sığınıblar». Deputat qurultayda gənclərin iştirak etmədiyinə də etirazını bildirib.

Kvemo-Kartl bölgə qubernatorunun müavini Hüseyn Yusifov isə təşkilat sıralarındakı fikir ayrılığından narazılıq edib: «Bizə iki dövlət daimi əzizdir. Azərbaycan milli vətənimiz, Gürcüstan isə ana vətənimizdir. Hər iki dövlət separatizmdən əziyyət çəkir. Biz hər iki dövlətin bütövlüyünü arzulayırıq».

Sonra nümayəndələrdən Qardabani rayon bələdiyyəsinin sədr müavini Xanəhməd Qəribov, «Ozan» qəzetinin redaktoru Kamil Kirəçli, Qardabani sakini Ucabəy Əliyev və başqaları konqresin keçmiş sədri Ə.Babayevin fəaliyyətindən narazılıq edib, eyni zamanda konqresin İdarə Heyətinin üzvlərinin özbaşınalığı və onların yarıtmaz işlərindən şikayət ediblər. Çıxışların sonunda Ə.Babayevin, eyni zamanda İdarə Heyətinin üzvlərinin istefası tələb olunub.

Tədbirin sonunda keçirilən səsvermə nəticəsində 27 nəfər GAK İdarə Heyətinə üzv, Kvemo-Kartli bölgə qubernatorunun müavini Hüseyn Yusifov isə yekdilliklə GAK-ın yeni sədri seçilib.

Xatırladaq ki, GAK-ın əvvəlki İdarə Heyətinin üzvlərindən Kamil Əliyev, Gülgəz Əliyeva, Ələddin Qarabağlı və Ramiz Bəkirov öz vəzifələrində saxlanılıb.