Diaspor

Diaspor

Suat Günsel: “Şimali Kipr Yaxın Doğu Universitetində 20-yə yaxın azərbaycanlı tələbə pulsuz təhsil alır”

28 noyabr 2010 13:59 (UTC +04:00)

Frankfurt. Laçın Sultanova – APA. Yaxın Doğu Universitetində Gürcüstan vətəndaşları olan 20-yə yaxın azərbaycanlı tələbə pulsuz təhsil alır. Bu barədə APA-nın Frankfurta ezam olunmuş əməkdaşına Dünya Azərbaycanlı Gənclərinin 1-ci Konqresində iştirak edən Şimali Kipr Yaxın Doğu Universitetinin qurucu rektoru Suat Günsel bildirib. O deyib ki, bu layihəyə cari ildən başlanıb və bu iş davam etdiriləcək.

Tələbələrin 14 müxtəlif fakültədə oxuduqlarını söyləyən S. Günsel bildirib ki, həmin tələbələr öz millətlərini çox yaxşı təmsil edirlər.

Rektorun sözlərinə görə, ümumilikdə onun başçılıq etdiyi universitetdə 300 yaxın azərbaycanlı gənc oxuyur. Rektor tələbələrdən razılıq edib.

Özünü azərbaycanlı saydığını söyləyən S. Günsel Azərbaycanın onun üçün önəmli bir yer olduğunu vurğulayıb.

Keçirilən toplantıya münasibət bildirən S. Günsel bu konqresə dəvət almağından şərəf duyduğunu da qeyd edib: “Azərbaycanın dünyada yaşayan gənclərinin qarşısına çıxmaq, Azərbaycan dövlət böyüklərinin hüzurunda olmaq, onlara fikirlərimi söyləmək mənim üçün böyük şərəfdir. Onlara demək istədiyim odur ki, gənclərimiz hər zaman bütün olmağa çalışmalıdır. Bu gün Azərbaycan gənclərinə baxanda, Azərbaycanı görürük, hər şey onlar üçün və onlardan sonra gələn nəsillər üçündür. Bu baxımdan onlar həm ailələri, həm ölkələri, həm də qardaş bildikləri ölkələrlə bütün olmağa önəm verməlidirlər”.