Diaspor

Diaspor

Səfir: “Hollandiyadakı miqrantlar arasında azərbaycanlılar dövlətə ən az problem yaradan, cəmiyyətə ən çox inteqrasiya edən millətdir”

28 noyabr 2010 14:17 (UTC +04:00)

Dünya Azərbaycanlı Gənclərinin 1-ci Konqresinin keçirilməsinə münasibət bildirən səfir bu tədbirin böyük əhəmiyyəti olduğunu vurğulaypıb: “Mən bu görüşdən gələcək üçün nəticəli, səmərəli fəaliyyət gözləyirəm. Yeni nəsil formalaşır. Yaxın 20 ildə bu insanlar bizim millətimizin təmsilçiləri, rəhbərləri olacaqlar. Biz onlarla qürur duyuruq, ona görə ki, çox savadlı, çox professional səviyyədə hazırlıqlı və çox vətənpərvər, öz dövlətini, millətini sevən gəclərimiz var. Bu gənclər gələcəkdə çox ciddi nailiyyətlər əldə edəcəklər”.

Niderlanddakı Azərbaycan diasporu barədə məlumat verən diplomat bu ölkədə bir sıra Azərbaycan diaspor təşkilatlarının fəaliyyət göstərdiyini diqqətə çatdırıb: “Onların arasında Benilüks Azərbaycanlılar Konqresi, Azərbaycan Türk Kültür Dərnəyi, qadınların ictimai təşkilatı, mədəni qurumlar və s. göstərmək olar. Onlar Azərbaycan dövlətçiliyi, azərbaycançılıq ideyaları əsasında qurulub və Azərbaycan milli maraqlarının Avropa məkanında həyata keçməsinə böyük köməklik göstərirlər. Xocalı abidəsi ilk dəfə Avropada Haaqa şəhərində qoyulub, ilk həftəsonu məktəblər Rotterdam və Amsterdam şəhərlərində açılıb, ilk dəfə bizim mədəniyyətlərarası dialoq təbliğatını həyata keçirən qurumlar Niderlandda ciddi nailiyyətlər əldə ediblər. Diaspor təşkilatları o qədər fəaldırlar ki, bu fəallıq yerli əhaliyə də təsirini göstərir. Təsadüfi deyil ki, artıq Azərbaycan-Holland Dostluq Cəmiyyəti yaranıb. Bu cəmiyyət sırf hollandlardan ibarətdir. Hazırda senatın prezidenti olan Rene Van Der Linden Holland Dostlarının ilk sədri olub, lakin hazırda senatın sədri olduğuna görə ictimai quruma rəhbərlik etmək ixtiyarı yoxdur. Bu onun göstəricisidir ki, bizim diaspor fəaliyyətimiz nəinki klassik diplomatiyaya, yerli əhali tərəfindən ictimai rəyin formalaşmasına da təsir göstərir”.

Azərbaycanlıların Niderlandda aktiv ictimai fəaliyyətlə də məşğul olduqlarını deyən F. İsgəndərov bildirib ki, azərbaycanlılar Niderland hökuməti və cəmiyyəti üçün problem yaratmırlar: “Niderland ötən əsrin 90-cı illərindən başlayaraq on minlərlə miqrant qəbul edib. Onların arasında azərbaycanlılar dövlətə ən az problem yaradan, holland cəmiyyətinə ən çox inteqrasiya edən millətdir”.