Diaspor

Diaspor

Dünya Azərbaycanlı Gənclərinin I Konqresi başa çatıb, Konqresin qətnaməsi qəbul olunub

28 noyabr 2010 20:54 (UTC +04:00)

APA-nın Frankfurta ezam olunmuş əməkdaşının məlumatına görə, Azərbaycanın Belçikadakı səfiri Emin Eyyubov «Xaricdə yaşayan azərbaycanlı gənclərin yaşadıqları cəmiyyətlərə inteqrasiyası» mövzusunda çıxış edib. O bildirib ki, əhalisi 10 milyon olan Belçikanın ərazisi Azərbaycandan 3 dəfə kiçikdir, amma Avropa İttifaqı miqyasında böyük dövlətdir. “Azərbaycanlıların yaşadıqları ölkələrin cəmiyyətinə inteqrasiyası ən vacib məsələlərdən biridir” deyən səfir bu prosesin müəyyən vaxt tələb etdiyini söyləyib. Diplomat bildirib ki, ölkədə doğulan insanların cəmiyyətə inteqrasiyası daha asan mümkün olur, nəinki onların bu ölkəyə köçüb gəlmiş valideynlərinin...

Belçikada yaşayın azərbaycanlıların sayı barədə məlumat verən səfir bildirib ki, konsulluqda qeydiyyatda olanların sayı 150 nəfərdir, qeyri rəsmi statistikaya görə isə bu ölkədə 700-800 azərbaycanlı ailəsi yaşayır. Səfir son illər Belçikada yaşayan türk mənşəli insanların cəmiyyətdə mövqelərinin möhkəmləndiyini bildirib, deyib ki, hazırda Belçika parlamentində 2 türk mənşəli deputat, hökumətində 1 türk mənşəli nazir var.

Paneldə çıxış edənlər gənclərə tövsiyə ediblər ki, yaşadıqları ölkələrdə Azərbaycanın mədəniyyəti, tarixi, ədəbiyyatı, musiqisi və mətbəxini təbliğ etsinlər, ilk növbədə, azərbaycanlıların bir etnos kimi sevilməsinə çalışsınlar.

İnteqrasiyaya mane olan aspektlərdən biri kimi gənclərin Azərbaycan cəmiyyəti ilə bağlılığı qeyd olunub. Bəzən onlar yalnız Azərbaycanla bağlı olur, yaşadıqları cəmiyyətə çox qoşulmurlar. Digər aspekt isə odur ki, onlardan bəziləri burada müvəqqəti olduqlarını düşündükləri üçün özlərini qonaq kimi hiss edirlər.

Təhsil alandan sonra qalıb işləmək istəyənlərin isə digər problemlərinin olduğu qeyd edilib. Problemlərdən biri də təhsillərini bitirəndən sonra onların iş tapa bilməmələridir. İş tapmayanlar ikinci və üçündü təhsil almaq yoluna əl atırlar.

Təhsil almaq üçün dövlət proqramı əsasında xaricə ildə yüzlərlə tələbənin getdiyini söyləyən konqres iştirakçıları bildiriblər ki, hazırlıqsız gələnlər burada mədəni şokla rastlaşır. Təklif olunub ki, dili zəif bilənlər üçün Təhsil Nazirliyi tərəfindən intensiv təlim kursları təşkil olunmalıdır. Həmçinin təklif edilib ki, hər ölkəyə inteqrasiyaya virtual dəstək göstərən sayt yaradılsın.

Lobbi quruculuğu prosesində gənclərin iştirakı barədə danışan iştirakçılar bildiriblər ki, ABŞ-dan fərqli olaraq, Avropada lobbi çox da müsbət qəbul olunmur, burada qanunverici orqanlarla iş aparmaq vacibdir. Hətta o da bildirilib ki, lobbi işində kütləvi şəkildə fəaliyyət göstərmək bəzən əks təsir göstərir, daşa professional iş aparılmalıdır.

Amerika Azərbaycan Cəmiyyətinin sədri Tomris Azəri təmsil etdiyi cəmiyyətin fəaliyyəti barədə danışıb. Dağlıq Qarabağ münaqişəsinin Azərbaycanın ağrılı problemi olduğunu deyən T. Azəri üzünü gənclərə tutaraq «Sizin Vətəninizə borcunuz var, dava yalnız Azərbaycan dövlətinin davası deyil, bu, hamımızın borcudur», deyib. Xaricdə, o cümlədən ABŞ-da yaşayan azərbaycanlı uşaqların milli ruhda böyüməsinin vacibliyi barədə danışan T. Azəri bildirib ki, 150 amerikalı ailə Azərbaycandan övladlığa uşaq götürüb: «Biz həmin uşaqlara baş çəkirik, onlara Azərbaycanı sevdiririk. Valideynləri onlara Azərbaycanda doğulduqlarını bildirirlər, hətta bəziləri söyləyir ki, onun böyütdüyü uşaq gələcəkdə ABŞ-ın Azərbaycandakı səfiri olacaq».

Konqres iştirakçıları müxtəlif təkliflərlə çıxış ediblər. Təkliflər arasında diaspor ensiklopediyasının, diaspor və lobbi təlim mərkəzinin yaradılması, Dağlıq Qarabağ münaqişəsini əks etdirən, dünya ekranlarına çıxa biləcək bədii filmin çəkilməsi və s. səsləndirilib.

Bununla da, konqres işini başa çatdırıb. Konqresin sonunda toplantı iştirakçıları Azərbaycan prezidenti İlham Əliyevə müraciət qəbul ediblər. Müraciətdə deyilir: «Konqres nümayəndələri ölkənin inkişafı və tərəqqisi, eləcə də milli diaspor quruculuğu və gənclərlə iş sahəsində Azərbaycan dövlətinin gördüyü işlərin əhəmiyyətini yüksək qiymətləndirir. Bununla yanaşı, biz hesab edirik ki, azərbaycanlı gənclər bu siyasətə daha fəal dəstək verməli, ümummilli mənafelərdən irəli gələn məsələlərin həllində daha yüksək templə iştirak etməlidirlər. Biz - Dünya Azərbaycanlı Gənclərin I Konqresinin iştirakçıları Sizi əmin edirik ki, dünyanın hər hansı ölkəsində yaşamasından asılı olmayaraq, hər bir azərbaycanlı gənc Azərbaycan xalqının milli maraqlarının qorunması naminə bütün gücü ilə mübarizə aparmaq, Azərbaycan prezidentinə daim dəstək vermək əzmindədir”.

Konqres iştirakçıları Ermənistan-Azərbaycan, Dağlıq Qarabağ münaqişəsi ilə əlaqədar dünya ictimaiyyətinə, beynəlxalq təşkilatlara, xarici ölkələrin parlamentlərinə,
dövlət və hökumət başçılarına da müraciət qəbul ediblər. Sənəddə deyilir: «Biz - Dünya Azərbaycanlı Gənclərin 1-ci Konqresinin iştirakçıları dünya ictimaiyyətinə, beynəlxalq təşkilatlara, sülhün və dostluğun tərəfində olan bütün ölkələrin rəhbərləri və parlamentlərinə müraciət edərək, Cənubi Qafqaz regionunun əmin-amanlığı, bu bölgədə yaşayan insanların təhlükəsizliyi, uşaqların gələcəyi naminə Ermənistan-Azərbaycan, Dağlıq Qarabağ münaqişəsinin həlli üçün öz səylərini səfərbər etməyə çağırırıq. Biz əminik ki, yalnız dünya birliyinin ədalətli, qətiyyətli və prinsipial mövqeyi Cənubi Qafqazın təhlükəsiz gələcəyinin açarıdır”.

Dünya Azərbaycanlı Gənclərinin I Konqresinin qətnaməsi də qəbul olunub. Həmin sənəddə azərbaycanlı gənclər təşkilatlarının diaspor quruculuğu, Azərbaycan həqiqətlərinin dünya ictimaiyyətinə çatdırılması, milli-mənəvi dəyərlərimizin qorunması, insan hüquq və azadlıqlarının müdafiəsi, mədəni irsimizin təbliği istiqamətində fəaliyyətinin koordinasiya edilməsi məqsədilə Dünya Azərbaycanlı Gəncləri Birliyinin (İttifaqı) təsis edilməsi ideyası dəstəklənib. Dünya Azərbaycanlı Gəncləri Birliyinin təsis edilməsi ilə əlaqədar təşəbbüs qrupu yaradılıb.