Diaspor

Diaspor

Ceyhun Osmanlı: “Səfərimizin məqsədi Fransa və Böyük Britaniyada təhsil alan azərbaycanlı tələbələrlə ümumi tanışlıqdır”

03 dekabr 2010 11:57 (UTC +04:00)

Bakı-APA. Azərbaycan Milli Məclisinin deputatı Ceyhun Osmanlının APA-ya müsahibəsi

- Sizin də təmsil olunduğunuz nümayəndə heyətinin sabah Paris və Londona səfəri başlayır. Səfərin məqsədi nədir?

- Səfərin məqsədi Fransa və Böyük Britaniyada dövlət və qeyri-dövlət proqramları üzrə təhsil alan azərbaycanlı tələbələrlə ümumi tanışlıqdır. Hesab edirik ki, xaricdə təhsil alan tələbələrimizin təhsil həyatlarını, onların məişət qayğılarını diqqət mərkəzində saxlamalıyıq. Azərbaycan prezidenti cənab İlham Əliyev Azərbaycanda insan kapitalının inkişafı baxımından gənclərimizə olan yatırımı, onların hərtərəfli inkişafını diqqət mərkəzində saxlayır. Hər bir gəncimizin inkişafı ilə yanaşı, onların vətənlə əlaqələrinin kəsilməməsi, istər xaricdə, istərsə də Azərbaycanda milli dövlətçilik ideyalarının yaşaması gərəkdir. Odur ki, yetişən gəncliklə, onların problemləri ilə mövcud imkanlar arasında körpü rolunu oynamaq çox önəmlidir. Ayrı-ayrı ölkələrdə yaşayan gənclərimizin istər bir-biri ilə əlaqələnməsi, istərsə də Azərbaycanın mənafeyi baxımından önəmli layihələr ətrafında birləşməsi çox vacibdir. Lakin təbii ki, hər bir tələbənin ilk hədəfi mükəmməl təhsil alaraq, öz sahəsinin peşəkarına çevrilməsidir. Nümayəndə heyətində gənclər və idman naziri Azad Rəhimov, Prezident Administrasiyasının siyasi təhlil və informasiya təminatı şöbəsinin müdiri Elnur Aslanov, Dövlət Neft Fondunun prezidenti Şahmar Mövsümov, təhsil nazirinin müavini Elmar Qasımov, Prezident Administrasiyasının beynəlxalq əlaqələr şöbəsinin sektor müdiri Həsən Məmmədzadə, Xaricdə Təhsil Almış və Məzun olmuş Azərbaycan Gənclərinin Beynəlxalq Forumunun (ASAİF) sədri Orxan Əkbərov və başqa şəxslər nümayəndə heyətində təmsil olunur.

- Parisdə və Londonda görüşlər harada və nə vaxt baş tutacaq?

- Fransadakı tələbələrimizlə görüş 5 dekabr, saat 14:00-da Azərbaycan Respublikasının Fransadakı səfirliyində, Böyük Britaniyadakı tələbələrimizlə görüş 6 dekabr , saat 17:00-da Londonda “Royal Garden Hotel”də keçiriləcəkdir. Fürsətdən istifadə edərək mən bir daha oradakı gənclərimizi görüşə dəvət edirəm.

- Görüşün proqramına qeyd etdiyiniz məsələdən əlavə hansı məsələlər daxildir?

- Ümumiyyətlə tələbələrimiz görüş zamanı onları maraqlandıran istənilən sualı səsləndirərək cavab almaq imkanına sahib olacaqlar. Görüşlərin çox interaktiv keçəcəyinə əminəm. Eyni zamanda Xaricdə Təhsil Almış və Məzun olmuş Azərbaycan Gənclərinin Beynəlxalq Forumunun (ASAİF) sədri Orxan Əkbərov təşkilatın təqdimatını keçirəcək, Paris və Londonda təşkilatın nümayəndələri ilə görüşəcək, indiyə qədər ASAİF tərəfindən keçirilmiş layihələrin analizi ilə yanaşı, bundan sonra təşkilatın keçirəcəyi layihələr ətrafında fikir mübadiləsi aparılacaq. Səfər çərçivəsində gənclərimizin təhsil aldığı bəzi universitetlərdə də görüş keçiriləcək.