Diaspor

Diaspor

21 Azər Hərəkatının 65-ci ildönümü münasibətilə tədbir keçirilib - FOTO

21 Azər Hərəkatının 65-ci ildönümü münasibətilə tədbir keçirilib - <font color=red>FOTO</font>

16 dekabr 2010 10:06 (UTC +04:00)

Bakı. Ramil Məmmədli – APA. Dünya Azərbaycanlıları Konqresinin (DAK) Azərbaycan nümayəndəliyi Güney Azərbaycan Milli Hökumətinin (21 Azər Hərəkatı) 65-ci ildönümü münasibətilə tədbir keçirib. APA-nın məlumatına görə, DAK Azərbaycan nümayəndəliyinin rəhbəri Səftər Rəhimli deyib ki, Güney Azərbaycan Respublikasının yaradılması və bu dövlətin inkişaf etməsi SSRİ-ni, İranın şah rejimini, o cümlədən beynəlxalq ictimaiyyəti narahat edib: “Dünyanın o zamankı super dövlətləri Azərbaycanda qurulan milli hökuməti yıxmaq və bu dövləti yaradanları məhv etmək üçün Pəhləvi rejiminə dəstək verdilər. Nəticədə milli hökumət dağıdıldı, Təbriz fars rejimi tərəfindən işğal edildi və minlərlə Azərbaycan türkü qətlə yetirildi. Hökumətin başçısı Seyid Cəfər Pişəvəri isə Azərbaycan SSR-də sui-qəsd nəticəsində öldürüldü”.

Azərbaycanın İran İslam Respublikasındakı keçmiş səfiri Əlyar Səfərli bildirib ki, Seyid Cəfər Pişəvərinin həyatı, Güney Azərbaycan milli hökumətinin yaradılması və süqutu yetərincə öyrənilməyib: “Bu günə qədər açıqlanmır ki, Pişəvərinin Azərbaycan SSR-də öldürülməsində milliyətcə erməni olan şəxsin xüsusi rolu olub. Bu şəxs onun sürücüsü idi”.

Azərbaycan Milli Elmlər Akademiyasının Tarix İnstitutunun professoru Tofiq Mustafazadə “21 Azər” Hərəkatının yaranma tarixi haqqında danışıb. Onun sözlərinə görə, Pəhləvilər hakimiyyətə gələnə qədər İranda türk hökmranlığı mövcud olub: “Səfəvilər, Əfşarlar və Qacarlar türk tayfalarıdır. Yalnız yazışmalar fars dilində aparılıb. “21 Azər” Hərəkatının yaranması da tarixi prosesin məntiqi nəticəsi idi. Beynəlxalq şərait Güney Azərbaycanda milli hökumətin qurulmasına və süquta yetməsinə səbəb oldu. Yəni Güney Azərbaycan beynəlxalq şəraitin qurbanı olub. Çünki dünya SSRİ-nin genişlənməsini istəmirdi”.

Tədbirdə digər çıxışlar da olub və müzakirələr aparılıb.