Diaspor

Ana səhifə

Diaspor

Azərbaycan diaspor təşkilatları Avropa Parlamentinin Ermənistan üzrə əsas məruzəçisinin Dağlıq Qarabağa səfərinə etiraz bildiriblər

23 dekabr 2010 11:41 (UTC +04:00)

Bakı-APA. Müxtəlif ölkələrdə fəaliyyət göstərən Azərbaycan diaspor təşkilatları Avropa Parlamentinin Ermənistan üzrə əsas məruzəçisi, Polşadan olan deputat Tomaş Porebanın işğal edilmiş ərazilərə qeyri-qanuni səfər etməsinə kəskin etirazlarını bildirirlər. Bu barədə APA-ya Diasporla İş üzrə Dövlət Komitəsinin mətbuat xidmətindən bildirilib. Məlumata görə, bununla bağlı olaraq Avropa Azərbaycanlıları Konqresi, Benilüks Azərbaycanlıları Konqresi, Türkiyə Azərbaycan Dərnəkləri Federasiyası, Ümumrusiya Azərbaycan Konqresi, Amerika Azərbaycan Cəmiyyəti, Amerika Azərbaycan Şurası, Moldova Azərbaycanlıları Konqresi, Litva Azərbaycanlıları Cəmiyyəti, Polşa-Azərbaycan Birlik Assosiasiyası, Almaniyadakı Azərbaycanlıların Koordinasiya Mərkəzi, Azərbaycan Federasiyası İsveç (AFİ), Türkiyə-Azərbaycan Dərnəyi, Latviyadakı “Ocaq” Mədəniyyət Mərkəzi, Rusiyanın Çelyabinsk vilayətindəki “Ozan” Azərbaycan Mədəniyyət Mərkəzi, Birləşmiş Ərəb Əmirliyindəki “Azərbaycan” Cəmiyyəti, ABŞ-ın Hyuston şəhərindəki Azərbaycan Mədəniyyət Mərkəzi, Gürcüstan Azərbaycanlıları Konqresi, Gürcüstandakı Azərbaycanlıların Mədəniyyət Mərkəzi, Qazaxıstan Azərbaycanlıları Mədəniyyət Mərkəzləri İttifaqı, Dünya Azərbaycanlıları Konqresi və digər diaspor təşkilatları müxtəlif ünvanlara bəyanatlar göndəriblər. Bəyanatlar Avropa Parlamentinin sədri Eji Buzekə, onun dəftərxana müdirinə, köməkçisinə, Polşa Seyminin Marşalı Gjegoj Sxetınaya, Tomaş Porebanın özünə, Polşa Xarici İşlər Nazirliyinə və Polşanın Azərbaycandakı Səfirliyinə göndərilib.

Bəyanatlarda bildirilir ki, Avropa Parlamentinin Ermənistan üzrə əsas məruzəçisi, Polşadan olan deputat Tomaş Porebanın işğal altında olan Dağlıq Qarabağ ərazisinə qeyri-qanuni səfəri Azərbaycan diasporunun ciddi narazılığına və etirazına səbəb olub: “Onun respublikamızın işğal edilmiş ərazilərinə Azərbaycan dövlətinin razılığı olmadan qeyri-qanuni səfər edərək Azərbaycan Respublikasının suverenliyi və ərazi bütövlüyünə hörmətsizlik göstərməsini qəti şəkildə pisləyən diaspor təşkilatlarının rəhbərləri öz bəyanatlarında qeyd edirlər ki, bu həm beynəlxalq hüququn normalarının, həm diplomatik etiketin pozulması deməkdir və vəzifəsindən asılı olmayaraq heç bir dövlətin vətəndaşı ölkəmizin ərazi bütövlüyünə sayğısızlıq göstərməməli, ermənilərin işğal etdiyi Qarabağ ərazisinə Azərbaycandan başqa heç bir dövlətin ərazisindən getməməlidir. Çünki bu cür səfərlər Ermənistanın işğalçılıq siyasətinə dəstək vermək deməkdir. Dövlətimizin suverenliyinə etinasızlıq nümayiş etdirən bu cür siyasətçilərin, ictimai-siyasi xadimlərin, o cümlədən ayrı-ayrı vaxtlarda Dağlıq Qarabağa müxtəlif tədbirlərdə iştirak etmək üçün gələn əcnəbi incəsənət ustalarının Azərbaycana girişi qadağan edilməlidir”.

Diaspor təşkilatları müraciət etdikləri ünvanlardan bir daha belə bir hala yol verilməməsini tələb ediblər.