Diaspor

Diaspor

Türk Asiya Strateji Araşdırmalar Mərkəzinin rəhbəri Azərbaycan Milli Məclisinin üzvü ilə görüşüb

23 dekabr 2010 12:13 (UTC +04:00)

Bakı – APA. Bakıda səfərdə olan Türk Asiya Strateji Araşdırmalar Mərkəzinin (TASAM) rəhbəri Süleyman Şensoy millət vəkili, Azərbaycan-Türkiyə Parlamentlərarası Dostluq Qrupunun üzvü Qənirə Paşayeva ilə görüşüb. APA-nın məlumatına görə, TASAM-ın təşkil etdiyi Dünya Türk Forumunda qəbul edilmiş yekun Bəyannamədə əksini tapan məsələlərin həyata keçirilməsi istiqamətində gördükləri işlərdən danışıb.

Q. Paşayeva isə parlamentin dekabrın 21-də keçirilən iclasında Türkdilli Ölkələrin Dövlət Başçılarının X Zirvə Toplantısının Bəyannaməsinin təsdiq edilməsi ilə yanaşı qardaş Türkiyə ilə Azərbaycan arasında strateji tərəfdaşlıq və qarşılıqlı yardım haqqında müqavilənin, həmçinin “Azərbaycan Respublikası və Türkiyə Respublikası arasında Yüksək Səviyyəli Strateji Əməkdaşlıq Şurasının yaradılması haqqında” Birgə Bəyannamənin təsdiq edilməsinin iki ölkə arasında münasibətlərin və əməkdaşlığın daha da genişlənməsi və sürətlənməsi istiqamətində mühüm əhəmiyyətindən danışıb.

Millət vəkili Azərbaycan prezidentinin və parlamentinin qardaş Türkiyə ilə münasibətlərin daha da genişləndirilməsi istiqamətində gördüyü işlər barədə də ətraflı məlumat verib.

Q. Paşayeva Azərbaycan dövlətinin türkdilli dövlətlərin və xalqların əməkdaşlığının genişləndirilməsinə, diasporların birgə fəaliyyətinə böyük önəm verdiyini vurğulayıb.

Azərbaycanın bu istiqamətdə gördüyü işləri yüksək qiymətləndirən TASAM prezidenti yaxın gələcəkdə Azərbaycanın müxtəlif qurumları ilə birgə tədbirlər və layihələr həyata keçirilməsi istiqamətində müzakirələr apardıqlarını və razılaşmalar əldə edildiyini bildirib.

Azərbaycan və Türkiyənin strateji mərkəzləri, qeyri-hökumət təşkilatları arasında da əməkdaşlığın genişlənməsinin çox vacib olduğunu vurğulayan Q. Paşayeva TASAM prezidentinə Ermənistanın işğal etdiyi Azərbaycan torpaqlarında törətdiyi vandalizm aktları, Ermənistanın Dağlıq Qarabağ münaqişəsinin tənzimlənməsi istiqamətində heç bir addım atmaması barədə də məlumat verib. Vurğulanıb ki, Dağlıq Qarabağ münaqişəsi ilə bağlı Azərbaycan həqiqətlərinin beynəlxalq ictimaiyyətə daha geniş tanıdılması, qondarma erməni soyqırımı yalanlarının qarşısının alınması istiqamətində iki ölkənin qeyri-hökumət təşkilatları, strateji araşdırmalar mərkəzlərinin də birgə səylərini daha da artırması, qarşılıqlı əməkdaşlıq şəraitində birgə çalışmalar həyata keçirməsi vacibdir. Qeyd olunub ki, iki ölkənin “beyin mərkəzləri” arasında elmi-tədqiqat sahəsində də müxtəlif layihələrin və tədbirlərin həyata keçirilməsi zəruridir.