Diaspor

Diaspor

Londondakı City Universitetində Azərbaycan Günü keçirilib

07 fevral 2011 11:18 (UTC +04:00)

Bakı - APA. Londondakı City Universitetində (City University) bu universitetin Azərbaycan Cəmiyyəti, Azərbaycan Evi və Avropa Azərbaycan Cəmiyyəti (AAC) Azərbaycan Günü keçirib. AAC-dan APA-ya verilən məlumata görə, tədbirə 100-dən çox qonaq qatılıb. Universitetin müəllim və tələbələri də qonaqlar arasında olub. Onlar Azərbaycanın mədəniyyəti və tarixi ilə tanış olmaq, son 20 ildə müstəqil ölkə kimi keçdiyi iqtisadi inkişaf yolu barədə məlumat əldə etmək imkanı qazanıblar.

Azərbaycana həsr olunmuş sərgi stendində ölkənin təbii mənzərələrini, xalqın həyatını əks etdirən şəkillər nümayiş olunub. Qonaqlara biznes və mədəniyyətin müxtəlif sahələrinə həsr olunmuş broşür və kitablar təqdim edilib, onlar xalçaçılıq kimi mədəni ənənələrdən bəhs edən videosüjetə baxıblar. Qonaqlara Azərbaycan mədəniyyətini əks etdirən kiçik suvenirlər və kitablar da təqdim olunub.

Qeyd edək ki, City Universitetində yeni yaradılmış Azərbaycan Cəmiyyətinə burada təhsil alan azərbaycanlı tələbələr daxildir. Cəmiyyət Azərbaycanı tanıtmaq üçün müxtəlif tədbirlər təşkil etməyi planlaşdırır.

Londonda fəaliyyət göstərən Azərbaycan Evi Mədəniyyət və Dostluq Mərkəzi Birləşmiş Krallıqda yaşayan bir qrup azərbaycanlı ziyalı, gənc peşəkar və tələbə tərəfindən yaradılıb. Mərkəz azərbaycanlılar və daha geniş ictimaiyyət arasında mədəni əlaqələr və dostluğu möhkəmləndirməyə xidmət edir.

Avropa Azərbaycan Cəmiyyəti isə Birləşmiş Krallıqda yaxşı tanınan fəal diaspor təşkilatıdır. Cəmiyyət son iki ildə Birləşmiş Krallıq, Almaniya və digər Avropa ölkələrində bir sıra Azərbaycan tələbə təşkilatlarını dəstəkləyib.