Diaspor

Ana səhifə

Diaspor

DAK Türkiyədə “Xocalı həftəsi” keçirəcək- FOTO

DAK Türkiyədə “Xocalı həftəsi” keçirəcək- <font color=red> FOTO</font>

08 fevral 2011 14:47 (UTC +04:00)

Bakı. Ramil Məmmədli – APA. Dünya Azərbaycanlıları Konqresinin (DAK) rəhbərliyi mətbuat konfransı keçirib. APA-nın xəbərinə görə, mətbuat konfransında Güney Azərbaycanda baş verən son hadisələr, ötən həftə DAK həmsədri Sabir Rüstəmxanlının İsveçrəyə səfəri, yaxın günlərdə Türkmənçay müqaviləsinin 183-cü ildönümünə həsr olunmuş simpoziumun təşkili və 21-26 fevral tarixlərində Türkiyədə keçirilməsi planlaşdırılan “Xocalı həftəsi” barədə məlumat verilib.

DAK həmsədri Sabir Rüstəmxanlı bildirib ki, BMT-nin Cenevrədə yerləşən Ali Komissarlığında keçirdikləri görüşlər zamanı Güney Azərbaycandakı türklərin insan haqları, BMT-nin Bakı ofisinin yarıtmaz fəaliyyəti, Azərbaycan hökumətinin çox zaman ölkəyə mühacir kimi gələn güney azərbaycanlılara mənfi münasibəti, hətta deportasiya edilməsi BMT rəsmilərinin diqqətinə çatdırılıb. Xocalı faciəsinin ildönümünün yaxınlaşdığını xatırladan S. Rüstəmxanlı qeyd edib ki, Xocalı hadisəsinin Türkiyə Böyük Millət Məclisində soyqırım kimi qəbul olunması üçün DAK fəaliyyətini genişləndirməyi nəzərdə tutub: “21-25 fevral tarixlərində Türkiyədə “Xocalı həftəsi” keçiriləcək. Bu tədbir çərçivəsində Türkiyə parlamentində millət vəkilləri ilə mütəmadi görüşlər keçiriləcək və onlardan Xocalıda baş verənlərin soyqırım kimi qəbul olunması istəniləcək. Çalışacağıq ki, istəyimizə nail olaq”.

“Azəri-Türk” Qadınlar Birliyinin sədri Tənzilə Rüstəmxanlı isə Beynəlxalq Qızıl Xaç Cəmiyyətinin təşəbbüsü ilə Belçika Senatında keçirilən görüşlərdən danışıb. Onun sözlərinə görə, görüş zamanı Ermənistan-Azərbaycan münaqişəsi zamanı girov götürülən, əsir və itkin düşən azərbaycanlılar barədə məlumat verilib: “Ermənistan iddia edir ki, Azərbaycanda 805 erməni əsir və girovluqdadır. Əslində isə müharibə zamanı 4050 azərbaycanlı əsir düşüb və girov götürülüb, onlardan 1399-u geri qaytarılıb. Azərbaycanda 6 Ermənistan vətəndaşı var, onların 5-i bir ailənin üzvləridir, 1-i hərbçidir. Onların hamısı könüllü biz tərəfə keçib”.