Diaspor

Diaspor

Norveçdə Xocalı faciəsinə həsr olunmuş tədbir keçiriləcək

15 fevral 2011 14:12 (UTC +04:00)

Bakı. Laçın Sultanova-APA. Fevralın 24-də Norveç Azərbaycanlıları Gənclər Təşkilatının (NAYO) təşəbbüsü ilə Xocalı soyqırımının 19-cu ildönümü münasibəti ilə Norveçin Holokost mərkəzində “Xocalı: Faciədən öyrəndiklərimiz” (Khoyali: Lesson from Tragedy) adlı seminar keçiriləcək, eyni zamanda Heydər Əliyev Fondunun sözügedən faciə ilə bağlı hazırladığı foto sərgi nümayiş etdiriləcək.

APA-nın məlumatına görə, seminarda Azərbaycanın İsveçdəki fövqəladə və səlahiyyətli səfiri Rafael İbrahimov fəxri qonaq kimi iştirak edərək Xocalı soyqırımı və onun törətdiyi fəsadlar haqqında danışacaq. Seminar-sərgi layihəsində NAYO-nun üzvləri, Norveç hökumətin nümayəndələri, norveçli və əcnəbi siyasətçilər, tədqiqatçılar, professorlar, Norveçdə təhsil alan yerli və xarici tələbələr, kütləvi informasiya vasitələrinin nümayəndələri iştirak edəcəklər.

Bu seminarla bağlı NAYO-nun idarə heyətinin növbədənkənar toplantısı keçirilib. Toplantıda çıxış edən NAYO-nun sədri Ramil Əliyev ilk dəfə olaraq Norveçin məşhur Holokost mərkəzində Xocalı soyqırımı ilə bağlı tədbir keçirdiklərini bildirib. “Seminara “Xocalı: Faciədən öyrəndiklərimiz” adını verməkdə əsas məqsədimiz həm norveçlilərə, həm burada yaşayan digər millətlərin nümayəndələrinə sözügedən faciə ilə bağlı tarixi faktları çatdırmaqdır. Azərbaycan xalqına qarşı zaman-zaman törədilmiş tarixi faciələr, əsasən də Xocalı soyqırımı xalqımıza çox məsələləri aydınlaşdırmağa və daha ətraflı dərk etməyə imkan yaratdı. Mənfur qonşularımız olan ermənilərin xalqımıza qarşı törətdiyi soyqırımı siyasətini dünyanın harasında yaşamasından asılı olmayaraq hər bir azərbaycanlı, xüsusən də gənclərimiz dünya ictimaiyyətinə və beynəlxalq təşkilatlara çatdırmaq üçün bütün imkanlarından istifadə etməlidirlər”.