Diaspor

Ana səhifə

Diaspor

Qazaxıstanda Xocalı soyqırımına həsr olunmuş tədbir keçirilib

22 fevral 2011 14:33 (UTC +04:00)

Bakı. Laçın Sultanova-APA. Qazaxıstan Azərbaycanlıları Mədəni Mərkəzləri İttifaqı və Xəzər Astana Mədəni Mərkəzi Qazaxıstanın Biznes və Texnologiya Universitetində Xocalı soyqırımının 19-cu ildönümü ilə əlaqədar tədbir keçiriblər. APA-nın məlumatına görə, Azərbaycan və Türkiyə səfirliyinin əməkdaşlarının, eləcə də, Azərbaycan, türk, qırğız diasporunun üzvləri, Qazaxıstan ziyalıları və habelə universitetin müəllim və tələbə heyətinin, azərbaycanlı gənclərin iştirak etdiyi tədbirdə Xocalı soyqırımını əks etdirən foto-stend, kitablar, sənədli film nümayiş etdirilib.

Xocalı soyqırımı qurbanlarının xatirəsi 1 dəqiqəlik sükutla yad edildikdən sonra, Qazaxıstan Biznes və Texnologiya Universitetinin prezidenti Seyidqasım Baybekov, universitetin nəzdindəki kollecin direktoru Şerim Tuleqenov dünyada Xocalı soyqırımı və buna oxşar terrorların baş verməməsi üçün bütün dünyanın sülhsevər xalqlarının terrora qarşı, həmçinin Xocalı terroruna qarşı birləşərək yox deməyinin vacibliyini vurğulayıb.

Xocalı faciəsi haqqında danışan azərbaycanlı məktəbli Laçın Həsənova dünyadakı bütün yaşıdlarına səslənərək, erməni qəsbkarları tərəfindən törədilən bu faciə nəticəsində 63 uşağın öldürüldüyünü, 25 uşağın hər iki valideynini itirdiyini, 76 uşağın güllə ilə yaralandığını bildirərək, “dünyadan kömək istəyirəm” deyib.

Qazaxıstan Azərbaycanlıları Mədəni Mərkəzləri İttifaqının prezidenti Vidadi Salahov təkcə azərbaycanlı olduqlarına, milli mənsubiyyətlərinə görə məhv edilmiş bir şəhərin və onun insanlarının qanına susamış cinayətkar ermənilərin və rus silahlılarının cinayətinə indiyə kimi göz yumulmasından danışaraq günahkarların “Qarabağ tribunalı”adlı məhkəməyə çəkilmələrinin vaxtının yetişdiyi bildirib.

Azərbaycanın Qazaxıstandakı səfirliyinin əməkdaşı Nizami Rüstəmov, Astanadakı Xəzər Azərbaycan Mədəni Mərkəzinin sədri Vidadi Ağayev, Qazaxıstanın dəfələrlə olimpiya çempionu olmuş hüquq fakültəsinin tələbəsi Elgün Səmədov tədbirdə çıxış ediblər.