Diaspor

Ana səhifə

Diaspor

Mançesterdə Xocalı soyqırımı ilə bağlı aksiya keçirilib

26 fevral 2011 15:42 (UTC +04:00)

Bakı - APA. Böyük Britaniyanın Mançester Universitetində təhsil alan bir qrup Azərbaycanlı və xarici tələbələr tərəfindən Xocalı faciəsinin ildönümü ilə bağlı FM tipli anım aksiyası təşkil edilib.

APA-nın məlumatına görə, aksiya “Xocalıya Ədalət” kampaniyası çərçivəsində Mançester Azərbaycan Cəmiyyətinin dəstəyi ilə təşkil edilib.

Saat 12.00-da başlayan aksiya universitetin əsas binasının qarşısında bir neçə saat davam edib. Aksiya zamanı universitetin bütün dərs otaqlarından görünən meydanda gənclər qərənfillərlə universitet şəhərciyinin həyətinə “Xocalı” sözünü yazaraq şəhidlərin xatirəsinə şam yandırıblar.

Daha sonra iştirakçıların bəziləri aksiyaya BBC telekanalının Mançesterdə yerləşən şimal qərargahının qarşısında davam edib. Soydaşlarımız “Xocalıya Ədalət”, “Azərbaycana Ədalət”, “Soyqırıma son” kimi şüarları səsləndiriblər. Daha sonra tələbələr BBC-nin şimal qərargahının önündən şəhərin mərkəzi - Piccadilly Gardens istiqamətində yürüş ediblər. Aksiya nəticəsində bir çox əcnəbi vətəndaş “Xocalıya Ədalət” bəyanatını imzalayaraq kampaniyaya dəstək olublar.

Qeyd edək ki, “Xocalıya Ədalət” kampaniyası 2008-ci il mayın 8-də - Şuşanın işğalının ildönümündə İslam Konfransı Gənclər Forumunun Mədəniyyətlərarası Dialoq üzrə Baş Koordinatoru Leyla Əliyevanın təşəbbüsü ilə irəli sürülüb və hazırda 30-dan artıq ölkədə yüzlərlə könüllünun iştirakı ilə uğurla davam etdirilir. Kampaniyanın məqsədi beynəlxalq ictimaiyyətin Xocalı faciəsi ilə bağlı məlumatlandırılması, faciəyə beynəlxalq aləmdə siyasi-hüquqi və mənəvi qiymət verilməsi və həmçinin beynəlxalq səviyyədə anılmasını təmin etməkdir. Kampaniyanın beynəlxalq əlaqələndirilməsi www.justiceforkhojaly.org saytı vasitəsilə aparılır.