Diaspor

Ana səhifə

Diaspor

Sankt-Peterburqda “Xocalıya Ədalət” mövzusunda elmi-praktiki konfrans keçirilib

26 fevral 2011 15:49 (UTC +04:00)

Sankt-Peterburq. Fərid Əkbərov – APA. Fevralın 25-də Sankt-Peterburqun M.Qorki adına Mədəniyyət Evində Heydər Əliyev Fondunun Rusiya nümayəndəliyi və Azərbaycanın Sankt-Peterburqdakı Baş Konsulluğun birgə təşkilatçılığı ilə Xocalı soyqırımın 19-cu ildönümünə həsr olunmuş “Xocalıya Ədalət” mövzusunda elmi-praktiki konfrans keçirilib.
APA-nın Rusiya müxbirinin verdiyi məlumata görə, konfransa 600-dən çox soydaşımız qatılıb.
Konfransda Sankt-Peterburq ictimaiyyətinin nümayəndələri, bir sıra ali təhsil ocaqların müəllimləri, nüfuzlu iş adamları, tələbələr və KİV nümayəndələri iştirak edib. Tanınmış yazıçı, professor Yuriy Pompeyevin şəxsi xatirələri əsasında yazılmış “Qarabağ gündəliyi” və Robert Arakelovun “Erməni ziyalısının etirafı” kitablarının təqdimatı keçirilib. Xocalıda törədilmiş vəhşilikləri əks etdirən fotosərgi nümayiş olunub, o cümlədən tədbir iştirakçılarına Heydər Əliyev Fondu tərəfindən hazırlanmış “Qarabağ həqiqətləri” məlumat toplusu təqdim edilib.
Konfransı giriş sözü ilə açan baş konsul Qüdsi Osmanov Xocalı soyqırımının dünya ictimaiyyəti tərəfindən tanınmasında İslam Konfransı Təşkilatının (İKT) Əməkdaşlıq və Dialoq Uğrunda Gənclər Forumunun mədəniyyətlərarası dialoq üzrə baş əlaqələndiricisi Leyla Əliyevanın irəli sürdüyü “Xocalıya Ədalət” beynəlxalq kampaniyası barədə geniş məlumat verib. Baş konsul hazırda kampaniyanın geniş vüsət aldığını tədbir iştirakçılarının diqqətinə çatdıraraq, İKT-nin Parlament İttifaqı tərəfindən qəbul olunmuş qətnamə barədə məlumat verib. O, gəncləri “Xocalıya Ədalət” kampaniyasında fəal iştirak etməyə çağırıb.
Heydər Əliyev Fondunun Rusiya nümayəndəliyini təmsil edən Moskva Dövlət Beynəlxalq Əlaqələr Universitetinin aspirantı Natiq Əliyev çıxışında “Xocalıya Ədalət” kampaniyası çərçivəsində görülən işlər barədə geniş məlumat verib.
Azərbaycan Milli Məclisinin MDB Parlamentlərarası Assambleyasındakı nümayəndəsi Aydın Cəfərov Xocalıda törədilmiş cinayətin dünya ictimaiyyətinə çatdırılması istiqamətində bütün imkanlardan istifadə olunacağını bildirib.
Tədbirdə iştirak edən nüfuzlu iş adamları çıxışlarında Xocalı faciəsinin beynəlxalq ictimaiyyətə çatdırmaq üçün bütün vasitələrdən istifadə olunmasının vacibliyini vurğulayıblar.
Daha sonra konfransda yenilənmiş www.justiceforkhojaly.org saytının təqdimatı keçirilib. İştirakçılara saytdan istifadə qaydaları barədə geniş məlumat verilib. Tədbir iştirakçıları tərəfindən Xocalıda törədilmiş cinayətə hüquqi qiymət verilməsi məqsədilə nüfuzlu beynəlxalq qurumlara ünvanlanmış bəyannamə qəbul olunub.