Diaspor

Ana səhifə

Diaspor

Xocalı soyqırımının qurbanları Litva Seymində anılıb - FOTO

Xocalı soyqırımının qurbanları Litva Seymində anılıb -<font color=red> FOTO</font>

26 fevral 2011 15:58 (UTC +04:00)

Bakı - APA. Litva Seyminin “Konstitusiya” zalında “Xocalıya Ədalət” kampaniyası çərçivəsində Xocalı qətliamının 19-cu ildönümünə həsr edilmiş konfrans keçirilib.

APA-nın məlumatına görə, Litva Seyminin deputatı Mantas Adomenasın rəhbərliyi və “Xocalıya Ədalət” kampaniyasının Litva üzrə koordinatoru İeva Lukoseviciutenin təşkilatçılığı ilə keçirilən tədbirdə deputatlar Andrius Burba, Petras Luomanas, Gediminas Aleksenas, Benas Petraitis, Siyasi Elmlər üzrə Akademiklər Birliyinin İdarə Heyətinin sədri Gintautas Reklys, Beynəlxalq Münasibətlər və Siyasi Elmlər İnstitutunun direktoru Egdunas Racius, Azərbaycanın Litvadakı səfiri Naira Şahtaxtinskaya, Gürcüstanın Litvadakı səfiri George Kerdikoshvili, Litva Gənclər Şurasının nümayəndəsi Paulius Miezelis, 1992-ci ildə Xocalı faciəsi zamanı Qarabağda reportyor kimi iştirak etmiş jurnalist Ricardas Lapaitis, Litva mədəniyyət nazirinin müşaviri İmantas Melianas və digərləri çıxış edib.

Çıxışçılar Xocalıda Azərbaycanlılara qarşı törədilmiş qətliamı pisləyib və cinayətkarların məsuliyyətə cəlb olunmasının vacibliyini vurğulayıblar. Tədbirdə ümumilikdə 10-a yaxın parlament üzvü, həmçinin Azərbaycan-Litva Cəmiyyətinin sədri Məzahir Həmzəyev və Litvada təhsil alan Azərbaycanlı tələbələr iştirak edib.

Tədbirin sonunda qonaqlar Xocalı şəhidlərinin xatirəsinə hazırlanmış əklili Neris çayına buraxıblar.

Qeyd edək ki, “Xocalıya Ədalət” kampaniyası 2008-ci il mayın 8-də - Şuşanın işğalının ildönümündə İslam Konfransı Gənclər Forumunun Mədəniyyətlərarası Dialoq üzrə Baş Koordinatoru Leyla Əliyevanın təşəbbüsü ilə irəli sürülüb və hazırda 30-dan artıq ölkədə yüzlərlə könüllünun iştirakı ilə uğurla davam etdirilir. Kampaniyanın məqsədi beynəlxalq ictimaiyyətin Xocalı faciəsi ilə bağlı məlumatlandırılması, faciəyə beynəlxalq aləmdə siyasi-hüquqi və mənəvi qiymət verilməsi və həmçinin beynəlxalq səviyyədə anılmasını təmin etməkdir. Kampaniyanın beynəlxalq əlaqələndirilməsi www.justiceforkhojaly.org saytı vasitəsilə aparılır.