Diaspor

Ana səhifə

Diaspor

Praqada “Xocalıya ədalət - Xocalıya işıq” aksiyası keçirilib

26 fevral 2011 16:29 (UTC +04:00)

Bakı. Şəhriyar Əlizadə - APA. Fevralın 25-də Praqanın mərkəzi “Namesti Miru” (Sülh) meydanında Azər-Çex Cəmiyyətinin təşkilatçılığı və Praqadakı Azərbaycan səfirliyinin dəstəyi ilə “Xocalıya ədalət - Xocalıya işıq” aksiyası keçirilib.

Azer-Çex cəmiyyətinin mətbuat xidmətindən APA-ya verilən xəbərə görə, Müqəddəs Lyudmila tarixi məbədinin qarşısında yerləşən ərazidə Xocalı çadırı qurulub və faciə haqda çex dilində sənədli film 4 saat ərzində nümayiş olunub. Bundan əlavə, Xocalı sərgisi qurulub, 500-dən çox buklet və broşürlar paylanılıb. Axşam saatlarında şamlar vasitəsilə Xocalı sözü yazılıb və iştirakçılar tərəfindən yandırılıb.

Tədbirin sonunda cəmiyyətin sədri Elşən Nəzərov iştirakçılara Dağlıq Qarabağ problemi və “Xocalıya Ədalət” beynəlxalq kampaniyası haqda məlumat verib.

Azərbaycanın Çexiyadakı səfiri Tahir Tağızadə çıxışında 19 il əvvəl ermənilər tərəfindən törədilən Xocalı faciəsi və 69 il əvvəl Çexiyanın Lidiçe şəhərində alman faşistləri tərəfindən törədilən hadisələri müqayisə edib, Azərbaycanın haqq səsinə dəstək vermək üçün Çexiya Respublikasına səslənib. Xocalının fəxri vətəndaşı, professor Vaqif Arzumanlı öz çıxışında faciənin acı nəticələrini iştirakçılara çatdırıb. Sonda Praqada fəaliyyət göstərən Türk məscidinin imamı Sadəddin Hoca şəhidlərimizin ruhuna dua oxuyub.

Qeyd edək ki, tədbirdə Azərbaycan və Çexiyanın ictimai xadimləri, rəsmi şəxslər, KİV və qeyri-hökumət təşkilatlarının nümayəndələri, eləcə də Azərbaycan Milli Məclisinin deputatı Gülər Əhmədova, Milli QHT Forumunun prezidenti Rauf Zeyni, Beynəlxalq Diaspora Mərkəzinin sədri İsmayıl Ağayev və Azərbaycan Ticarət Palatasının nümayəndəsi Ələsgər Həsənov iştirak ediblər.

Aksiyada nümayiş olunan materiallar Heydər Əliyev Fondu, Diasporla İş üzrə Dövlət Komitəsi, İngiltərədə fəaliyyət göstərən Odlar Yurdu təşkilatı, Gəncə şəhər İcra Hakimiyyəti və Azərbaycan Beynəlxalq Bankı tərəfindən dəstəklənib.