Diaspor

Ana səhifə

Diaspor

Camal Mehmetxanoğlu: “Türkiyədəki Azərbaycan türklərinin çoxu öz kimliklərini unudaraq özlərini Anadolu türkü kimi təqdim edirlər” - FOTO

Camal Mehmetxanoğlu: “Türkiyədəki Azərbaycan türklərinin çoxu öz kimliklərini unudaraq özlərini Anadolu türkü kimi təqdim edirlər” - <font color=red>FOTO</font>

10 mart 2011 09:33 (UTC +04:00)

Bakı. Ramil Məmmədli-APA. Türkiyədə yaşayan Azərbaycan Türklərinin I qurultayının keçirilməsi üzrə Təşkilat Komitəsi mətbuat konfransı keçirilib.

APA-nın məlumatına görə, komitənin rəhbəri, İzmir Azərbaycan Mədəniyyət Mərkəzinin direktoru və Türkiyədə fəaliyyət göstərən “CanAz” internet televiziyasının rəhbəri Camal Mehmetxanoğlu qurultayın aprelin 23-24-də keçiriləcəyini deyib. Onun sözlərinə görə, qurultaydan əvvəl isə 4-cü Novruz Festivalı, Bakı və Təbriz gecələri, Şövkət Ələkbərovanın, Səməd Vurğunun, Bulud Qaraçorlunun (Sehend), Əli Səliminin anım mərasimi də keçiriləcək.

O, qurultayın Türkiyədə yaşayan Azərbaycan türklərinin təşkilatlarının əlaqələndirilməsinə və fəaliyyətlərinin genişləndirilməsinə dəstək olacağına ümid etdiyini də söyləyib: “Türkiyədə rəsmi məlumatlara görə, 3 milyona qədər Azərbaycan türkü yaşayır. Bunlar Cənubi və Qərbi Azərbaycandan 1850-1870-ci illərdə, 1915-1930-cu illərdə Türkiyəyə köçmüş azərbaycanlılardır. Bu gün də Türkiyəyə azərbaycanlılar köçür. Qeyri-rəsmi hesablamaya görə, artıq Türkiyədə Azərbaycan türklərinin sayı 5 milyonu keçib”.

Türkiyədəki Azərbaycan təşkilatlarının əksərinin bir-biri ilə əlaqəsi olmadığını deyən C. Mehmetxanoğlu qeyd edib ki, bu ölkədə fəaliyyət göstərən Azərbaycan Dərnəkləri Federasiyasının apardığı iş qənaətbəxş deyil: “Qurultayda həmin quruma təklif olunacaq ki, ya fəaliyyətini genişləndirsin və Türkiyədəki bütün Azərbaycan təşkilatlarını fərq qoymadan bir araya toplasın, ya da kənara çəkilsin. Bu mənada qurultayda hələlik hansısa icra qurumunun yaradılacağını planlaşdırmamışıq. Çünki Türkiyədə 3 milyon azərbaycanlı sanki yatıb. Onların çoxu öz kimliklərini unudaraq, özlərini Anadolu türkü kimi təqdim edirlər”.

C. Mehmetxanoğlu Türkiyə-Ermənistan münasibətlərinin yumşalması istiqamətində edilən səylərə də münasibətini bildirib: “Türkiyədə fəaliyyət göstərən bütün Azərbaycan dərnəklərinin bu məsələdə bir mövqeyi var. Ermənistan işğalçılıq siyasətindən əl çəkməli və bundan sonra Türkiyə öz sərhədlərini Ermənistan üçün açmalıdır”.

C. Mehmetxanoğlu “Türkiyədə yaşayan Azərbaycan türkləri” adlı kitabın yaxın vaxtlarda nəşr olunacağını da diqqətə çatdırıb.