Diaspor

Diaspor

Avstraliyada Novruz bayramı münasibəti ilə tədbir keçirilib

20 mart 2011 17:25 (UTC +04:00)

Azərbaycan-Avstraliya-Türk Dostluq Cəmiyyətinin təşkilatçılığı ilə Türk Dayanışma Dərnəyində (Turkish House) təşkil olunan tədbirə Azərbaycan və Türkiyə diasporlarının nümayəndələri, o cümlədən Avstraliyada təhsil alan azərbaycanlı tələbələr və Avstraliya hakimiyyət orqanlarının rəsmi şəxsləri qatılıb.

Azərbaycan, Türkiyə və Avstraliyanın dövlət himlərinin səsləndirilməsi ilə başlayan tədbirdə rəsmi şəxslər qismində Yeni Cənubi Uels (NSW) ştatı parlamentinin üzvi və yerli hakimiyyətlər naziri xanım Barbara Peri, parlamentin aşağı palatasının üzvi, yaşlılar və veteranlara xidmət naziri Pol Qerard Linç, Parramatta dairəsindən federal parlamentinin üzvi xanım Culi Ouens, Azərbaycan-Avstraliya-Türk Dostluq Cəmiyyətinin prezidenti İmamməddin Qasımov, Türkiyənin Avstraliyadakı konsulu Emin Akseki iştirak edib .

Bundan başqa, Novruz ərəfəsində Avstraliya səfər edən, hazırda ABŞ-da mühacirətdə yaşayan Dünya Uyğur Türkləri Konqresinin prezidenti Rebiya Kader Azərbaycan-Avstraliya-Türk Dostluq Cəmiyyətinin dəvəti ilə tədbirə qatılıb.

Tədbirin rəsmi hissəsində çıxış edən İ. Qasımov iştirakçılara Novruz bayramının tarixi barədə məlumat verib. O, Novruz bayramının YUNESKO-nun dünyanın qeyri-maddi mədəni irsi siyahısına daxil edildiyi, habelə 21 mart tarixinin BMT tərəfindən Beynəlxalq Novruz Günü elan edildiyi barədə qonaqlara məlumat verib.

Onun sözlərinə görə, hazırda bahar bayramı dünyanın müxtəlif yerində yaşayan türkdilli xalqlar tərəfindən qeyd edilir. O, bu xalqların bir qisminin hələ də tərkibində yaşadıqları ölkələrin siyasi rejimləri tərəfindən təzyiqlərə məruz qaldıqlarını, hüquqlarının pozulduğunu bildirib.
Uyğur türklərinin təmsilçisi olan R. Kader çıxışında harada, hansı şəraitdə yaşamasından asılı olmayaraq türkdilli xalqlarının ortaq mədəniyyətlərini qoruyub saxlamalarının əhəmiyyətini qeyd edib.

Daha sonra çıxış edən, xanım B.Peri və xanım C. Ouens Azərbaycan və Türk icmasının kompakt yaşadıqları Obern (Auburn) qəsəbəsinin ictimai-siyasi həyatında əhəmiyyətli rol oynamağa başladıqlarını qeyd edərək, gələn həftə keçiriləcək seçkilərdə aktiv iştirak edəcəklərini qeyd ediblər.

Digər çıxış edənlər də bahar bayramı münasibəti ilə təbriklərini çatdıraraq, Novruz bayramının birliyi, həmrəyliyi və saflığı təcəssüm etdirdiyini bildiriblər.

Tədbirdə iştirakçılara Azərbaycan musiqisi və milli mətbəxin nümunələri təqdim olunub.