Diaspor

Ana səhifə

Diaspor

Meksikada Novruz bayramı münasibətilə iki tədbir keçirilib - FOTO

Meksikada Novruz bayramı münasibətilə iki tədbir keçirilib - <font color=red>FOTO</font>

23 mart 2011 07:57 (UTC +04:00)

Bakı - APA. Meksika Birləşmiş Ştatlarının paytaxtı Mexiko şəhərində Novruz bayramı ilə əlaqədar iki tədbir keçirilib.

Azərbaycanın Meksikadakı səfirliyindən APA-ya verilən məlumata görə, Meksika Konqresinin Deputatlar Palatasında Beynəlxalq Novruz gününə həsr olunmuş tədbir keçirilib.

Tədbirdə Azərbaycanın Meksikadakı səfiri İlqar Muxtarov, İran, İraq və Türkiyə səfirliklərinin rəhbər işçiləri, həmçinin Meksika Konqresinin deputatları, Mexiko şəhəri rəhbərliyi və Meksika ştatının İnsan Hüquqları Komissiyasının nümayəndələri iştirak ediblər.

Səfir İ.Muxtarov çıxışında bildirib ki, Azərbaycanın təşəbbüsü ilə BMT Baş Assambleyası tərəfindən 2010-cu ilin fevral ayında “Beynəlxalq Novruz günü” qətnaməsi qəbul olunub. Diplomat tədbir iştirakçıları və Novruz bayramını qeyd edən dünya xalqlarını təbrik edib, Novruz bayramının tarixi kökləri, qeyd edilmə adətləri haqda dinləyicilərə geniş məlumat verib.

Tədbirdə həmçinin İraq, İran və Türkiyə səfirliklərinin nümayəndələri çıxış edərək, Novruz bayramının öz ölkələrində keçirilmə tarixindən və xüsusiyyətlərindən bəhs ediblər. Meksika Konqresinin deputatı Ramon Ximenez Lopez beş min ildən artıq tarixi olan Azərbaycan mədəniyyətinin Meksikanın maya və astek mədəniyyəti ilə bir çox ümumi mədəni dəyərləri bölüşdüklərini bildirib.

Meksika ştatının İnsan Hüquqları Komitəsinin sədri Rosa Maria Pardinyas və Dini Dözümlük və Vicdan Azadlığı Daimi Komissiyasının baş koordinatoru Temis Kortes Azərbaycan xalqına sülh və əmin-amanlıq arzu edib, Ermənistanın Azərbaycana təcavüzü nəticəsində yurd-yuvasından didərgin düşmüş məcburi köçkünlərin yaxın gələcəkdə Novruz bayramını öz evlərində qeyd edəcəklərinə ümidvar olduqlarını bildiriblər.

Yerli mətbuat nümayəndələri və Konqresin televiziya kanalı əməkdaşlarının iştirak etdiyi tədbirdən sonra iştirakçılar Meksika Parlamentinin İctimai Park ərazisində Novruz bayramı münasibətilə simvolik ağac əkmə mərasiminə qatılıblar.

Qeyd edək ki, Azərbaycanın Meksikadakı səfirliyində də Novruz bayramı münasibətilə bayram tədbiri keçirilib. Tədbirdə Meksikada akkreditə edilmiş diplomatik nümayəndəliklərin üzvləri, o cümlədən Türkiyənin və Ukraynanın Meksikadakı səfirləri, Gürcüstanın Meksikadakı müvəqqəti işlər vəkili, Meksikada yaşayan Azərbaycan, Ukrayna, Rusiya, Gürcüstan, tatar, yəhudi icmalarının nümayəndələri və Meksikanın müxtəlif təşkilatlarının təmsilçiləri iştirak ediblər.