Diaspor

Ana səhifə

Diaspor

Tiflisdə fəaliyyət göstərən Suxumi Dövlət Universitetində “Azərbaycanın Dostları klubu” auditoriyası açılıb

08 aprel 2011 18:37 (UTC +04:00)

Tiflis. Nizami Məmmədzadə-APA. Gürcüstan paytaxtında Azərbaycanın Gürcüstandakı səfirliyinin təşəbbüsü və maliyyə dəstəyi ilə Suxumi Dövlət Universitetində “Azərbaycanın Dostları klubu” auditoriyası açılıb. APA-nın Gürcüstan bürosunun məlumatına görə, tədbiri Azərbaycanın Gürcüstandakı səfiri Namiq Əliyev açaraq Suxumi Dövlət Universitetində açılan bu klubun Azərbaycanın həyata keçirdiyi daxili və xarici siyasətin daha da tanınması üçün əhəmiyyət kəsb edəcəyini vurğulayıb. Universitetin rektoru, professor Coni Apakidze Azərbaycan səfirinə bu gözəl klubun açılmasında göstərdikləri təşəbbüsə və təşkilatçılığa görə təşəkkürünü bildirib. O, əmin olduğunu bildirib ki, gürcü-Azərbaycan dostluğu həmişə, hər zaman inkişaf edəcək və daha da möhkəmlənəcək.
Səfir N.Əliyev jurnalistlərə açıqlamasında bu klubun Gürcüstanda ikinci klub olduğunu bildirib. “Bu auditoriya Gürcüstan paytaxtında açdığımız ikinci auditoriyadır. Birinci auditoriya Heydər Əliyev Fondunun dəstəyi ilə İ.Cavaxişvili adına TDU-da açılıb və indi uğurla fəaliyyət göstərir. TDU-da demək olar ki, dəfələrlə ən əhəmiyyətli tədbirlər keçirilib. Auditoriya qiymətli kitablarla, Azərbaycanı özündə əks etdirən tarixi ədəbiyyatlarla və müasir mebel və vəsaitlərlə təchiz olunub. Bu auditoriyada oturanlar Azərbaycan haqqında tam məlumat alır və bizim ölkə haqqında onlarda xoş təsəvvürlər oyanır. Bu müsbət təcrübə göstərdi ki, əsasən qaçqınların təhsil aldığı və işlədiyi Suxumi Dövlət Universitetində də belə bir ikinci auditoriya açaq. Bu auditoriyanı qısa vaxt ərzində təmir elətdirdik və burada istənilən şərait yaratmışıq və buranı daha da zənginləşdirəcəyik. Məqsədimiz odur ki, bu auditoriyaya gələnlər Azərbaycanın və onun prezidenti İlham Əliyevin apardığı siyasətlə daha yaxından tanış olsunlar. Biz bilirik ki, Azərbaycanın siyasəti inkişaf, əməkdaşlıq, enerji təhlükəsizliyinə həsr olunub. Bu barədə Gürcüstanda kifayət qədər məlumat var. Bu universitetdə bütün millətlərdən tələbələr var. Hamı görməlidir ki, Azərbaycanın siyasəti nədir və o hara gedir. Bunu hamı bilməlidir”.
Suxumi dövlət Universitetinin rektoru, professor Coni Apakidze bu klubun açılmasının vacibliyini qeyd edib: “Bizim təhsil ocağında 50 nəfərə qədər azərbaycanlı tələbə oxuyur. Bu gün biz “Azərbaycanın Dostları klubu” auditoriyasını açdıq. Bu klub təkcə azərbaycanlılar üçün yox, eyni zamanda gürcü tələbələri üçün həmişə açıq olacaq. Biz burada Azərbaycanı və Gürcüstanı tərənnüm edən müxtəlif məzmunlu vacib tədbirlər həyata keçirəcəyik”.