Diaspor

Ana səhifə

Diaspor

Gürcüstanda yaşayan azərbaycanlılar yüksək vəzifələrə təyin olunmalarını tələb edirlər

21 aprel 2011 17:01 (UTC +04:00)

Tiflis. Nizami Məmmədzadə - APA. Gürcüstanda yaşayan azərbaycanlılar baş nazir Nika Gilauridən azərbaycanlıları yüksək vəzifələrə təyin etməyi tələb edirlər.

APA-nın Gürcüstan bürosunun məlumatına görə, bu barədə “Gürcüstanın azərbaycanlı gəncləri“ adlı qeyri-hökumət təşkilatının prezidenti Araz Ayvazov baş nazirə açıq məktubla müraciət edib. Müraciətdə deyilir ki, Gürcüstanda 600 min etnik azərbaycanlı yaşayır: “Onlar ölkənin ayrılmaz hissəsidir. Azərbaycanlılar ölkənin ictimai-siyasi həyatında fəal iştirak edir və prezident Mixail Saakaşvilinin komandasının dəstəyi ilə həmişə Gürcüstanın sabitliyini qoruyurlar. Buna bariz nümunə seçkilərdə azərbaycanlıların yüksək səs toplamasıdır”.

Müraciətdə qeyd olunub ki, azərbaycanlılar heç vaxt mitinqlər keçirməyib, qayda-qanunu pozmayıb, eyni zamanda siyasi və dini radikalizmə uymayıblar. Azərbaycanlı gənclər Gürcüstan və Azərbaycan arasında olan sıx iqtisadi əməkdaşlığı misal gətirərək, 2010-cu ildə ölkələr arası ixracın 244, idxalın isə 464 mln. dollar olduğunu qeyd ediblər: “Müraciətimizin məğzi odur ki, son zamanlar Gürcüstanın xarici işlər nazirinin müavini Aleksandr Nalbandovdan sonra Gürcüstanın maliyyə nazirinin müavini vəzifəsinə ikinci etnik erməni Qriqori Bayburt təyin olunub. Demək olar ki, Gürcüstanda azərbaycanlı əhali iki dəfə ermənilərdən çoxdur. Amma bircə nəfər də azərbaycanlı yüksək vəzifə tutmur. Siz deyirsiniz ki, Gürcüstanda biz bütün vətəndaşlara eyni göz ilə baxırıq. Belə olan təqdirdə bu faktı siz necə izah edə bilərsiniz?”.

Gürcüstanın etnik azərbaycanlı gəncləri baş nazirə xatırladıblar ki, ölkədə yaşayan erməni icmasının liderləri dəfələrlə erməni dilini onların məskunlaşdığı ərazilərdə ikinci dövlət dili kimi qəbul etməyi xahiş ediblər: “Ölkə əhalisinin üçdə birini təşkil edən azərbaycanlılar isə analoji tələbi heç zaman irəli sürməyiblər. Ümidvarıq ki, bizim müraciətimiz cavabsız qalmayacaq, bu problemin həlli üçün adekvat addımlar atılacaq”.