Diaspor

Ana səhifə

Diaspor

ABŞ-dakı Azərbaycan diasporu Şuşanın ermənilər tərəfindən işğalının ildönümü ilə bağlı kampaniya keçirir

29 aprel 2011 08:16 (UTC +04:00)

Vaşinqton. İzabel Levin – APA. ABŞ-dakı Azərbaycan diasporu Şuşa kampaniyası keçirir. APA-nın Vaşinqton müxbirinin məlumatına görə, artıq dördüncü ildir, keçirilən kampaniya çərçivəsində diaspor üzvləri seçkili rəsmilərə yüzlərlə məktub göndərərək, Şuşanın ermənilər tərəfindən işğalı və Azərbaycanın işğal olunmuş ərazilərində Ermənistan tərəfindən həyata keçirilən etnik təmizləmə siyasəti barədə məlumat verirlər.

“ABŞ-da yaşayan 400 000 və bütün dünyada yaşayan 40 milyon azərbaycanlı adından BMT-yə müraciət edərək, BMT Təhlükəsizlik Şurasının 822, 853, 874 və 884 saylı qətnamələrinin, BMT Baş Məclisinin A/RES/48/114 və digər qətnamələrinin həyata keçirilməsi üçün ciddi addımlar atmağı tələb edirik”, - deyə məktublarda bildirilir və bu qətnamələrin erməni qüvvələrinin Azərbaycan ərazilərindən qeydsiz-şərtsiz çıxmasını tələb etdiyi vurğulanır.

Diaspor üzvləri məktubda belə bir sual da qaldırırlar: “Əgər BMT Təhlükəsizlik Şurasının və Baş Məclisinin qətnamələri yerinə yetirilmirsə, onda onların nə əhəmiyyəti var?”

Məktub müəllifləri bildirirlər ki, Ermənistan bu qətnamələrə məhəl qoymur: “Bu vəziyyət ABŞ Konqresi və administrasiyası, bütün beynəlxalq ictimaiyyətin gözü önündə nə vaxtadək davam edə bilər? Bu il mayın 8-də Azərbaycanın tarixi Şuşa şəhərinin işğalının və dağıdılmasının 19-cu ildönümüdür. Şuşa bir vaxtlar Azərbaycan klassik musiqisinin mərkəzi, şərqin il operasının beşiyi olub. Şuşa musiqiçiləri, bəstəkarları və xanəndələri ilə tanınıb. İndi isə bu şəhər xarabaya çevrilib, Ermənistanın işğalçı, dağıdıcı və sistematik etnik təmizləmə siyasətinin qurbanı olub. Qeyd etmək lazımdır ki, 1992-ci ilədək Azərbaycanın Dağlıq Qarabağ vilayətinin ən mühüm və tanınan şəhəri olan Şuşanın əhalisinin 92%-i azərbaycanlılar olub. Şuşa erməni qüvvələri tərəfindən Xocalıda 613 dinc azərbaycanlının öldürülməsi ilə nəticələnən qətliamdan iki ay sonra işğal olunub”.

Məktubda daha sonra bildirilir: “Amerikada və bütün dünyada yaşayan azərbaycanlılar adından Sizdən xahiş edirik ki, bu problemin Azərbaycanın ərazi bütövlüyü çərçivəsində ədalətli həlli, BMT TŞ və Baş Məclisinin qətnamələrinin yerinə yetirilməsi üçün səylərinizi əsirgəməyəsiniz. Sizdən xahiş edirik ki, erməni işğalına son qoyulmasına, Azərbaycan ərazisində qanunsuz yerləşmiş erməni hərbi qüvvələrinin buradan çıxarılmasına, azərbaycanlı məcburi köçkünlərin öz yurd-yuvalarına qayıtmasına, Naxçıvanın blokadasının aradan qaldırılmasına, bütün hərbi əsirlərin və itkin düşmüşlərin qaytarılmasına yardım edəsiniz”.

Qeyd edək ki, artıq diasporun məktubuna cavablar da var. Merilend ştatından olan demokrat senator Barbara A. Mikulski cavab məktubunda Azərbaycan diasporunun BMT qətnamələrinin yerinə yetirilməsi ilə bağlı çağırışını yüksək qiymətləndirib.

Şuşa