Diaspor

Ana səhifə

Diaspor

ABŞ-dakı Azərbaycan diasporu Laçının işğalının ildönümü ilə bağlı Konqres üzvlərinə və mediaya məktublar göndərir

04 may 2011 14:21 (UTC +04:00)

APA-nın Vaşinqton müxbirinin verdiyi məlumata görə, məktublarda Laçının Ermənistan Silahlı Qüvvələri tərəfindən işğalının nəticələri öz əksini tapıb: “1992-ci il mayın 18-də erməni silahlı birləşmələri Laçın şəhərini və 121 ətraf kəndi işğal edərək, burada etnik təmizləmə həyata keçirdilər. Yüzlərlə mədəniyyət ocağı, tarixi abidə dağıdıldı. 63 341 Azərbaycan vətəndaşı öz yurd-yuvasından qovuldu. Rəsmi statistikaya görə, Laçının 267 sakini və müdafiəçisi öldürülüb”.

Məktublarda qeyd olunur ki, Laçının işğalı Ermənistanın Azərbaycana qarşı təcavüzkar siyasətinin davamı idi və onun ardınca Kəlbəcər, Ağdam, Zəngilan, Qubadlı, Füzuli və Cəbrayıl rayonları da işğal olunub, nəticədə bir milyon azərbaycanlı doğma evindən didərgin düşüb.

“1994-cü il atəşkəs əldə olunandan sonra ermənilər Ermənistandan və xaricdən köçənlərin Laçında qanunsuz məskunlaşması proqramına və Azərbaycanın təbii ehtiyatlarının icazəsiz istifadəsinə başladılar. ATƏT-in 2-11-ci il aprel ayına olan məlumatında bildirilir ki, beynəlxalq hüquqa zidd şəkildə, Laçına Ermənistandan qanunsuz olaraq 14000 erməni köçüb”.

“Amerikada və bütün dünyada yaşayan azərbaycanlılar adından sizdən xahiş edirik ki, məsələnin Azərbaycanın ərazi bütövlüyü çərçivəsində ədalətlə həll olunmasına yardım edəsiniz. BMT Təhlükəsizlik Şurasının 1993-cü ildə qəbul edilmiş 822, 853, 874 və 884 saylı qətnamələrinin, Baş Məclisin qətnamələrinin həyata keçirliməsinə, erməni işğalına və Azərbaycanı təbii ehtiyatlarının talanına son qoyulmasına nail olasınız. Azərbaycanlı məcburi köçkünlərin evlərinə qayıtmasına, Naxçıvanın blokadasına son qoyulmasına, hərbi əsirlərin və itkin düşmüşlərin qaytarılmasına yardım edəsiniz və Konqresin Laçının işğalını pisləyən bəyanat qəbul etməsinə nail olasınız”.