Diaspor

Ana səhifə

Diaspor

Berlində azərbaycanlı gənc rəssamın sərgisi keçirilib

06 may 2011 10:21 (UTC +04:00)

Bakı-APA. Berlində azərbaycanlı gənc rəssam Məryəm Ələkbərlinin sərgisi keçirilib.
Azərbaycanın Almaniyadakı səfirliyindən APA-ya verilən məlumata görə, sərgi Berlində fəaliyyət göstərən “Baku-Berlin” qalereyasında baş tutub. Azərbaycandan və Almaniyadan olan gənc rəssamlar Məryəm Ələkbərli və Daniel Larsen-Vefringin əsərlərindən ibarət sərgidə Azərbaycanın Almaniyadakı səfiri, alman rəssam və incəsənət xadimləri, Almaniya ictimaiyyətinin və bu ölkədə yaşayan Azərbaycan diasporunun üzvləri iştirak edib. Tədbiri giriş sözü ilə açan qalereyanın müdiri İbrahim Əhrari sərginin təşəbbüsçülərinə, sərgi müəlliflərinə, eləcə də sərginin keçirilməsində xidməti olan hər kəsə minnətdarlıq edib. Səfir P.Şahbazov iki ölkə arasında mədəniyyət əlaqələrinin möhkəmlənməsində “Baku-Berlin” Qaleriyasının mühüm roluna işarə edərək, bugünkü tədbirin isə xüsusi önəm daşıdığını vurğulayıb. Azərbaycan səfiri sərgisi nümayiş etdirilən hər iki rəssamın yüksək istedada malik olduğunu bildirib.
Tədbirdə çıxış edən Azərbaycan Dövlət Rəssamlıq Akademiyasının prorektoru, xalq rəssamı Salxab Məmmədov da gənc rəssamların fəaliyyətlərini davam etdirmələrinin zəruriliyini və onlara gələcəkdə xarici ölkələrdə sərgilərin keçirilməsini tövsiyə edib.
Alman rəssamı, Potsdam və Berlin İncəsənət Universitetinin dosenti İnqe Şmidt gənc rəssamların istedadı barədə eyni fikirləri bölüşdüyünü bildirib.
Sərgidə nümayiş etdirilən əsərlər tədbir iştirakçılarının marağına səbəb olmuş və iştirakçılar rəsmi hissədən sonra sərgi müəlliflərinə yaxınlaşaraq təəssüratlarını ifadə ediblər.