Diaspor

Diaspor

Təbriz həbsxanasında təkadamlıq kamerada saxlanan Səid Muğanlıya vəkil tutmağa icazə verilib

27 iyun 2011 07:12 (UTC +04:00)

Bakı. Ramil Məmmədli-APA. İranda türk dilində yazan tanınmış şair-publisist, jurnalist Səid Muğanlı həbsxanada təkadamlıq kamerada saxlanılır.

APA-nın İrandakı mənbələrə istinadən verdiyi məlumata görə, Təbriz şəhər Prokurorluğundan S. Muğanlının yaxınlarına bildirilib ki, onunla hər hansı təmasa icazə verilmir və o istintaq təcridxanasının təkadamlıq kamerasında saxlanılır. Yaxın 1 ay ərzində təcridxananın ümumi bölməsinə köçürülməsi nəzərdə tutulub. Prokurorluq S. Muğanlıya qarşı irəli sürülən ittihamın təfsilatları barədə məlumat verməkdən isə imtina edib. Ancaq bildirilib ki, ittiham aktı yalnız vəkil tutulduqdan sonra müdafiəni təşkil edəcək şəxsin iştirakı ilə təqsirləndirilən S. Muğanlıya elan ediləcək.

Məlumatda o da qeyd olunub ki, jurnalistə vəkil tutmasına isə icazə verilib və yaxın bir neçə gün ərzində S. Muğanlının müdafiəsini təşkil edəcək vəkilin kimliyi bəlli olacaq.

Qeyd edək ki, bir müddət öncə S. Muğanlı İran İslam Respublikasının dövlət quruluşunu, rəhbər şəxslərini tənqidi xarakterli şeir yazıb və müəllif bu şeiri internet resurslar vasitəsilə yayıb. İyunun 5-də isə o valideynlərinin yaşadığı Ərdəbil vilayətinin Muğan bölgəsinin Yelsu kəndindəki evlərində saxlanılıb. Evdə axtarış aparılıb və ona məxsus kompüter, kitablar və digər şəxsi əşyalar götürülüb. Bu səbəbdən də İran İnformasiya və Təhlükəsizlik Nazirliyinin əməkdaşları onu saxlayan zaman ədəbi fəaliyyəti ilə maraqlanıblar və əlyazmaları müsadirə olunub.

Hazırda S. Muğanlı Təbriz şəhərindəki təcridxanada saxlanılır. Artıq İranda yaşayan Azərbaycan türkləri arasında S. Muğanlının sərbəst buraxılması tələbi ilə bağlı imzatoplama kampaniyasına da başlanılıb.

Xatırladaq ki, Səid Muğanlı Azərbaycan tükcəsində yazılan ədəbiyyat nümunələrini əski əlifbaya çevirərək İrandakı türklərin maariflənməsi işində aktiv iştirak edən şəxslərdən biridir. O, 2007-2008-ci illərdə Bakıda keçirilən ədəbi məclislərin iştirakçısı olub. Bakıdan qayıtdıqdan sonra İranın dövlət quruluşuna xələl gətirə biləcək fəaliyyətdə ittiham olunaraq İran İnformasiya və Təhlükəsizlik Nazirliyi tərəfindən tutulub. Bir müddət sonra isə girov müqabilində sərbəst buraxılıb.