Diaspor

Ana səhifə

Diaspor

Ukraynada Sovet İttifaqı Qəhrəmanı Mikayıl Ələkbərovun abidəsinin təntənəli açılış mərasimi keçirilib - FOTOSESSİYA

Ukraynada Sovet İttifaqı Qəhrəmanı Mikayıl Ələkbərovun abidəsinin təntənəli açılış mərasimi keçirilib - <font color=red>FOTOSESSİYA</font>

28 iyun 2011 14:13 (UTC +04:00)

Mərasimdə iştirak edən siyasi elmlər namizədi Anar Tahirovun APA-ya verdiyi məlumata görə, Dnepropetrovsk vilayətinin dövlət administrasiyası rəsmilərinin, Azərbaycanın Ukraynadakı səfirliyinin, yerli hakimiyyət və diaspora nümayəndələrinin qatıldığı açılış mərasimində Dnepropetrovsk Vilayət Radasının sədri Yevgeni Udod tədbir iştirakçılarını salamlayaraq Böyük Vətən müharibəsi zamanı Dnepropetrovsk vilayətinin alman faşizmindən azad edilməsində Sovet İttifaqı Qəhrəmanı Mikayıl Ələkbərovun keçdiyi şərəfli döyüş yolundan danışaraq qeyd edib ki, Mikayıl Ələkbərov müharibəyə 17 yaşı olarkən 1942-ci ildə könüllü olaraq gedib. İlk döyüş yoluna Dnepropetrovsk vilayətindən başlayan Ələkbərov 1 il müddətində düşmənin 14 hücumunun dəf edilməsində əsl qəhrəmanlıq şücaəti göstərib. O 1943-cü il oktyabrın 14-də ağır döyüşlərdə yaralanaraq qəhrəmancasına dünyasını dəyişib. Ölümündən 12 gün sonra Sovet İttifaqı Qəhrəmanı adına layiq görülüb. Aradan 68 il ötməsinə baxmayaraq bu gün də Mikayıl Ələkbərovun cəsurluğunu unutmadıqlarını bildirən Rada sədri öz igidliyinə görə Ukrayna xalqının qəlbində əbədi qəhrəmanlıq təcəssümünə çevrilmiş dəyanətli Azərbaycan oğlunun xatirəsinin heç zaman unudulmayacağını vurğulayıb.

Tədbirdə çıxış edən Azərbaycanın Ukraynadakı səfiri Eynulla Mədətli Azərbaycanla Ukraynanın dövlət müstəqilliklərinin 20-ci ildönümü ərəfəsində qəhrəman Azərbaycan oğlunun xatirəsinin əbədiləşdirilməsinə görə Dnepropetrovsk Vilayətinin qubernatoru Aleksandr Vilkula və Dnepropetrovsk vilayət radasının deputatı Fəxrəddin Muxtarova öz dərin minnətdarlığını bildirib. Səfir belə bir abidənin ucaldılmasını Azərbaycanla Ukrayna arasında mövcud olan strateji dostluq əlaqələrinin bariz nümunəsi kimi dəyərləndirib.

Mərasimdə hər bir xalqın öz qəhrəman oğulları ilə tanındığını bildirən Dnepropetrovsk Vilayət Radasının deputatı Fəxrəddin Muxtarov 18 yaşında ikən canını Ukrayna xalqı uğrunda fəda etmiş qəhrəman Azərbaycan oğlunun abidəsinin ucaldılmasını xalqlarımız arasındakı sarsılmaz dostluq əlaqələrinin növbəti təntənəsi kimi dəyərləndirib: “ən bu gün böyük fəxarət hissi keçirirəm ki, azərbaycanlılar da Ukraynanın alman faşizmindən azad olunmasında əsil qəhrəmanlıq göstəriblər Bu gün Azərbaycanla Ukraynanın beynəlxalq arenada strateji müttəfiqlər kimi tanınmasında Mikayıl Ələkbərov kimi minlərlə qəhrəman oğullarımızın öz payı var. Mən Dnepropetrovsk vilayətinin qubernatoru Aleksandr Vilkula minnətdarlığımı bildirirəm ki, belə bir şərəfli işin həyata keçirilməsini mənə həvalə edib. Bu abidənin açılması həmdə təməli Heydər Əliyev tərəfindən qoyulmuş Azərbaycan Ukrayna dostluğunun günü gündən inkişaf etdirilməsinin əyani təzahürü, prezidentlər İlham Əliyevlə Viktor Yanukoviçin dövlətlərimiz naminə həyata keçirtdikləri məqsədyönlü siyasətin nəticəsidir”.

Rəsmi hissədən sonra Azərbaycan və Ukraynanın Dövlət Himnləri və yaylım atəşi sədaları altında qəhrəman Azərbaycan oğlunun abidəsinin açılışı olub. Onun parlaq xatirəsi abidəsinin önünə gül çələngləri qoyulmaqla yad edilib. Qeyd edək ki, abidənin müəllifi Ukraynanın xalq rəssamı Seyfəddin Qurbanovdur.