Diaspor

Diaspor

İsveç Azərbaycanlıları Konqresinin rəhbəri: “Azərbaycan diasporu ilk növbədə Xocalı faciəsinin Avropa parlamentləri tərəfindən soyqırımı kimi tanınmasına can atmalıdır”

29 iyun 2011 09:05 (UTC +04:00)

Bunun üçün Avropada yaşayan azərbaycanlı gənclərin fəaliyyətini stimullaşdıran xüsusi proqram qəbul etmək lazımdır”. Bu açıqlamanı APA-ya İsveç Azərbaycanlıları Konqresinin rəhbəri Emil Mirzəyev verib.

2004-cü ildən İsveçdə yaşayan Emil Mirzəyev azərbaycanlı gəncləri diasporun işinə cəlb etməkdə çətinliklərlə üzləşdiyini vurğulayıb: “Dəfələrlə əslən haralı olduğunu söyləməkdən çəkinən azərbaycanlı gənclərlə qarşılaşmışam. Azərbaycanın “Eurovision” müsabiqəsində qələbəsindən sonra gənclərin diaspor fəaliyyətinə marağı tədricən artmağa başlayıb”.

Emil Mirzəyevin sözlərinə görə, İsveç Azərbaycanlıları Konqresinin əsas fəaliyyəti Azərbaycan maraqlarının daimi təbliğatı ilə məşğul olmaq, xüsusilə Dağlıq Qarabağ münaqişəsi ilə bağlı, Xocalı soyqırımı ilə bağlı həqiqətləri ictimaiyyətə çatdırmaq üzərində qurulub: “Biz İsveç cəmiyyəti daxilində Azərbaycan lobbisi yaratmağa çalışırıq. Həm rəsmi, həm də cəmiyyət səviyyəsində. Konqres öz fəaliyyətinə bu yaxınlarda başlayıb və hesab edirik ki, öz fəaliyyətimizi genişləndirmək üçün İsveçdə yaşayan, doğulan və böyüyən gənc azərbaycanlıları cəlb etmək əsas diqqət mərkəzimizdə olmalıdır”.

Bu məqsədlə Emil Mirzəyev Dünya Azərbaycanlılarının III qurultayında təkliflərlə çıxış etməyə hazırlaşır. Onun sözlərinə görə, hər il öz vətəninin tarixi və coğrafiyası ilə daha yaxından tanış olmaq üçün xaricdə yaşayan azərbaycanlı gənclər üçün yay düşərgələri təşkil edilməlidir. Diaspora rəhbəri bildirib ki, İsveç və digər ölkələrdəki diaspor qurumlarının əsas hədəfi Xocalı faciəsinin yerli parlamentlər tərəfindən soyqırımı kimi tanınmasına nail olmaq olmalıdır. İsveç Azərbaycanlıları Konqresi bu məqsədlə İsveç parlamentinin deputatları ilə mütəmadi əlaqə saxlayır və görüşlər keçirir.

diaspor