Diaspor

Diaspor

Səftər Rəhimli: “Sabir Rüstəmxanlı və Firidun Pərviznianın DAK-ın Azərbaycan nümayəndəliyinin fəaliyyətini dayandırmaq səlahiyyəti yoxdur”

18 iyul 2011 12:50 (UTC +04:00)

Bu açıqlamanı APA-ya DAK-ın Azərbaycan nümayəndəliyinin rəhbəri Səftər Rəhimli deyib. O bildirib ki, bütün komandası ilə fəaliyyət göstərməkdə olan nümayəndəliyin və konqresin İdarə Heyətinin fəaliyyətinə DAK həmsədrlərinin müdaxiləsi mümkün deyil: “Nizamnaməyə görə, həmsədrlər öz icra aparatlarında struktur dəyişikliyi edə və vəzifə bölgüsü apara bilərlər. Qurultayda İdarə Heyəti formalaşır və nümayəndəliklər təsdiq edilir. DAK-ın Azərbaycan Nümayəndəliyi qurumun bölgə nümayəndəlikləri içərisində ən aktividir”. S. Rəhimli qeyd edib ki, nümayəndəliyinin qeydiyyatdan keçib-keçməməsi onun rəhbərlik etdiyi təmsilçiliyin fəaliyyətinə heç bir mənfi təsir etmir: “Təmsilçiliyin qeydiyyatdan keçməməsi isə İranla Azərbaycan arasındakı münasibətlərin gərginləşməməsi məqsədi daşıyır, bu da dövlətin aidiyyatı qurumu tərəfindən bizə bildirilib. Ona görə də bunu əsas gətirib, nümayəndəlin ləğv etmək heç bir məntiqə uyğun deyil. Bu cür məsuliyyətsiz davranışlar DAK-ın Qadınlar və Ağsaqqallar şuralarının, o cümlədən Gənclər Birliyinin dağılmasına gətirib çıxarıb. DAK-ın inkişafı uğrunda mübarizə paran çoxlu sayda insan da məhz bu münasibətə görə kənarda qalıb. DAK-ın gündən-günə zəiflədilməsi İran rejiminin maraqlarına xidmət edir”. S. Rəhimli tələb edib ki, bu informasiya təkzib edilməlidir: “Əks təqdirdə, DAK-da baş verən əsas hadisələr mətbuat konfransı keçirilərək, media vasitələrinin diqqətinə çatdırılacaq. Bundan sonra baş verəcək bütün hadisələrin məsuliyyəti Sabir Rüstəmxanlının üzərinə düşəcək”.

DAK Nəzarət Təftiş Komitəsinin sədri Samir Əsədli isə APA-ya deyib ki, DAK-ın Azərbaycan Nümayəndəliyinin növbəti qurultaya qədərki fəaliyyətini qurumun İcra Aparatı həyata keçirəcək: “İcra Aparatı isə Bakıda fəaliyyət göstərir. Səftər Rəhimli də DAK İdarə Heyətinin üzvü kimi fəaliyyətini davam etdirir və biz onun fəaliyyətini təqdir edirik. Nizamnamədə nümayəndəliyin formalaşdırılması və sədrin nümayəndəlik rəhbəri təyin olunması DAK həmsədrlərinin səlahiyyətlərinə aid məsələ kimi qeyd olunub. Hörmətli Səftər Rəhimli qeyd edib ki, bu, qurultayın səlahiyyətidir və həmsədrlər buna müdaxilə edə bilməz. Bu fikir kökündən yanlışdır. Çünki Səftər Rəhimlini həmsədrlər bu vəzifəyə təyin edib”. O, S. Rəhimlinin DAK-ın Qadınlar və Ağsaqqallar şurasının dağılması ilə bağlı açıqlamasına da münasibət bildirib: “DAK Qadınlar Şurasının sədri Həvva Məmmədova olub. O, deputat seçildikdən sonra isə DAK-da fəaliyyətini dayandırıb. Ağsaqqallar Şurasının sədri isə Babaxan Muradov olub. DAK-dan üç nəfər ayrılıb, Demokratik Dünya Azərbaycanlıları Konqresinə qoşulanda o da həmin adamlara birgə DAK-dan gedib. Gənclər Təşkilatı isə öz fəaliyyətini normal davam etdirir”. S. Əsədli bildirib ki, bu günə kimi DAK-ın bütün yükü Sabir Rüstəmxanlının üzərinə düşüb: “DAK-ın parçalanmadan bu günə kimi gəlib çıxmasının, bir sıra ölkələrdə qeydiyyata alınmasının səbəbkarı Sabir Rüstəmxanlıdır”.

Qeyd edək ki, bu gün DAK-ın mətbuat xidməti DAK-ın Azərbaycan Nümayəndəliyinin fəaliyyətinə xitam verilməsi barədə məlumat yayıb. Məlumatda bildirilib ki, DAK həmsədrləri Sabir Rüstəmxanlı və Firidun Pərviznia təşkilatın Nizamnaməsini əsas tutaraq, iki ildən artıq müddətdə DAK-ın Azərbaycan nümayəndəliyinin qeydiyyata alınması mümkün olmadığına görə bu qurumun fəaliyyəti dayandırılır. Eyni zamanda həmin sərəncamla bu işə məsul təyin edilmiş DAK İdarə Heyətinin üzvü Səftər Rəhimli təşkilatın Azərbaycan nümayəndəliyinin rəhbəri məsuliyyətindən azad edilir.

DAK