Diaspor

Diaspor

Niderland Krallığının Osterveyk şəhərinin nümayəndə heyəti Diasporla İş üzrə Dövlət Komitəsində olub

28 iyul 2011 13:38 (UTC +04:00)

Bakı-APA. Azərbaycanda səfərdə olan Niderland Krallığının Osterveyk şəhərinin meri Hans Yansenin rəhbərlik etdiyi nümayəndə heyəti Azərbaycan Respublikası Diasporla İş üzrə Dövlət Komitəsində olub. Komitənin mətbuat xidmətindən APA-ya verilən məlumata görə, görüşdə 26 min sakini olan Niderland Krallığının Osterveyk şəhərinin 800 illik yubiley tədbirləri çərçivəsində 2012-ci ildə açılacaq yeni parka Niderland torpaqlarının faşist qoşunlarından azad edilməsində igidlik göstərmiş və bu ölkədə “Medo” ləqəbi ilə məşhur olan azərbaycanlı Məmməd Məmmədovun adının verilməsinin planlaşdırıldığı qeyd olunub. Bu barədə qərarı Osterveyk şəhər bələdiyyəsi qəbul edib.

Osterveyk şəhərinin meri Hans Yansenin rəhbərlik etdiyi 10 nəfərdən ibarət nümayəndə heyətinin tərkibinə Məmməd Məmmədovun qızı Nensi Doomen (Məmmədova) da daxildir.

Diasporla İş üzrə Dövlət Komitəsi sədrinin müavini Valeh Hacıyevlə görüşdə Niderland Krallığındakı Azərbaycan diasporunun mövcud durumu müzakirə olunub. Osterveyk şəhərinin meri Hans Yansen Niderland Krallığında yaşayan azərbaycanlıların ölkənin ictimai, iqtisadi və mədəni həyatında fəal iştirak etdiklərini və bu fəaliyyətin Azərbaycan və Niderland xalqları və dövlətləri arasında münasibətlərin daha da inkişaf etdirilməsinə xidmət etdiyini bildirib.

Niderland Krallığı nümayəndə heyətinin Azərbaycana səfəri iyulun 30-dək davam edəcək. Səfər çərçivəsində nümayəndə heyəti Bakı ilə yanaşı Zaqatala və Şəkidə də bir sıra görüşlər keçirib.

Niderland _ diaspor