Diaspor

Diaspor

İsveç Azərbaycanlıları Konqresi ATƏT-in Minsk Qrupu həmsədrlərini Ermənistan prezidentinin təcavüzkar bəyanatına qarşı etiraz notası verməyə çağırıb

29 iyul 2011 08:45 (UTC +04:00)

Bakı-APA. İsveç Azərbaycanlıları Konqresi Cənubi Qafqazda sülh və əmin-amanlığın bərqərar olunmasında maraqlı olan BMT, ATƏT və beynəlxalq vasitəçiləri Ermənistan prezidenti Serj Sərkisyanın erməni gəncliyində yanlış fikir yaradan işğalçı xarakterli bəyanatlarına kəskin etirazlarını bildirməyə çağırıb. APA-nın Diasporla İş üzrə Dövlət Komitəsinə istinadən yaydığı məlumata görə, İsveç Azərbaycanlıları Konqresinin yaydığı bəyanatda qeyd olunur ki, Serj Sərkisyanın “Qarabağ düşmənlərdən azad olunub, yeni nəsil isə Ağrı dağı almalıdır” bəyanatı erməni gəncliyinin yeni nəslində qonşu ölkələrə qarşı nifrətin formalaşmasına xidmət edir və dövlət xadiminə yaraşmayan bir hərəkətdir.

ATƏT-in Minsk Qrupunun Dağlıq Qarabağ münaqişəsinin nizamlanmasına dair Bakı ilə İrəvan arasında danışıqlar prosesinin davam etdirilməsinə səy göstərdiyi bir vaxtda prezident Serj Sərkisyanın belə bir bəyanat verməsi Ermənistan siyasi elitasının Azərbaycan torpaqlarının işğalı faktını qəbul edərək, məqsədyönlü surətdə ATƏT-in Minsk Qrupunun sülhün əldə olunması üzrə səylərinə əngəl törətməyə cəhd etdiyini və bununla da beynəlxalq hüququn başqa dövlətlərin ərazi bütövlüyünə hörmətlə yanaşılmasına dair bir norma və prinsiplərini kobud şəkildə pozduğunu bir daha təsdiqləyir.

Bəyanatda BMT Təhlükəsizlik Şurası, Avropa Şurası, NATO, Avropa Parlamenti, İslam Konfransı Təşkilatının Azərbaycanın ərazi bütövlüyünü tanıdıqları və Ermənistanın özünün hərbi qüvvələrini işğal olunmuş Dağlıq Qarabağ bölgəsindən və Azərbaycanın digər 7 rayonunda çıxarılmasını tələb edən qətnamələr qəbul etdiyi qeyd olunur.

“Biz Azərbaycan və Türkiyə hökumətlərinin xalqlarımızın bir-biri ilə sülh və əmin-amanlıq şəraitində yaşamağı öyrənməli olmasına və qonşu ölkələrin ərazilərinin işğalına son qoyulmasına dair rəsmi mövqelərini dəstəkləyir və hesab edirik ki, bizim xalqların gələcək nəsillərində bub ideyanı tərbiyə etmək gərəkdir. İsveç Azərbaycanlıları Konqresi Cənubi Qafqazda sülh və əmin-amanlığın bərqərar olunmasında maraqlı olan BMT, ATƏT və beynəlxalq vasitəçiləri Ermənistan prezidenti Serj Sarqsyanın erməni gəncliyində yanlış fikir yaradan işğalçı xarakterli bəyanatlarına kəskin etirazlarını bildirməyə çağırır”.