Diaspor

Diaspor

Son beş ayda ABŞ Konqresinə Türkiyə əleyhinə beş qanunvericilik aktı təqdim edilib

01 avqust 2011 09:48 (UTC +04:00)

Vaşinqton. İzabel Levin-APA. ABŞ Konqresində antitürk əhval-ruhiyyəli xüsusi etnik maraq qrupları son beş ayda Türkiyə əleyhinə beş qanunvericilik aktı təqdim ediblər. Bu isə Azərbaycan və türk diasporlarını onlara qarşı birləşməyə məcbur edib. Bu barədə APA-nın Vaşinqton müxbiri xəbər verir.

Həmin qanunvericilik aktları aşağıdakılardır:
a) H. R. 304 qətnaməsi tarixi dəlil və beynəlxalq tribunal olmadan Türkiyəni soyqırımı törətməkdə ittiham edir;
b) H. R. 306 Türkiyənin xristian irsini dağıtdığını iddia edir;
c) H. R. 180 və S. R. 196 qətnamələri Türkiyənin dünyəvi məsələlərinə müdaxilə edir və Vatikanın yunan ortodoks versiyasını İstanbuldan çıxarmağı tələb edir;
d) H. R. 2597 qətnaməsi isə 1974-cü il Kiprin türk əhalisini qorumaq üçün başlanan Kipr sülh əməliyyatını işğal adlandırır.

“Ötən həftə Nümayəndələr Palatasının Xarici Əlaqələr Komitəsi H. R. 2583 qətnaməsinə Türkiyəni dini diskriminasiyada ittiham edən Berman-Ciciline əlavəsini edib. Bu əlavə ilə bağlı erməni və yunan lobbisinin fəaliyyətindən məyus olan respublikaçı Dana Rohrabaxer Türkiyəni təcrid etmək üçün “dəhşətli ikili standratların” yürüdüldüyünü deyib. Erməni maraq qrupları qərbi Azərbaycanın işğalının qanuniləşdirilməsi və 800 min azərbaycanlı məcburi köçkünün ABŞ-ın yardımından məhrum edilməsi üçün kampaniyanı davam etdirirlər”, diasporun bəyanatında belə deyilir.

Bu iki etnik lobbinin fəaliyyəti Yunanıstanda fəlakətli borc böhranı və Ermənistanda iqtisadiyyatın tənəzzülü ilə bir vaxta təsadüf edir. “Bloomberg”in hesabatına görə, Yunanıstan iqtisadiyyatı qismən defoltla üzləşib, burada borc reytinqi CC səviyyəsinədək düşüb ki, bu da tam defoltun iki addımlığındadır. “Forbes” jurnalı isə Ermənistanı dünyanın ən pis iqtisadiyyata malik ölkələri sırasında ikinci pilləyə yerləşdirib. Türkiyə və Azərbaycanda isə presedenti olmayan iqtisadi artım müşahidə olunur.

“ABŞ xarici siyasətinə kölgə salan və Konqresin diqqətini böhranlı iqtisadiyyatdan yayındıran etno mərkəzli fəaliyyət əvəzinə, erməni və yunan maraq qrupları inkişaf etməkdə olan türk qonşuları ilə əməkdaşlıq etsəydilər, Amerikaya və öz etnik vətənlərinə daha çox xeyir verərdilər”. Azərbaycan və türk diasporlarının ABŞ rəsmilərinə çağırışında belə deyilir.