Diaspor

Ana səhifə

Diaspor

DAK qurumda baş verən proseslərlə bağlı bəyanat yayıb

05 avqust 2011 13:57 (UTC +04:00)

Bakı. Ramil Məmmədli-APA. Dünya Azərbaycanlıları Konqresi (DAK) qurumda baş verən proseslər və bununla bağlı yaranan vəziyyətlə bağlı bəyanat verib.

DAK mətbuat xidmətindən APA-ya verilən məlumata görə, bəyanatda bildirilib ki, DAK-dan bu və ya digər səbəblərdən ayrılmış və ya kənarlaşdırılmış bəzi insanlar təşkilat adından ictimaiyyətə müraciətlər edir, məsələnin mahiyyətindən yayınmağa çalışır, birləşmək adı altında bölücülüyə xidmət edən informasiyalar yaymaqla bilərəkdən və ya bilməyərəkdən düşmən dəyirmanına su tökürlər: “Məsələnin mahiyyəti ondan ibarətdir ki, son illər bu qurumun sıraları daha da genişlənmiş, qurumda nüfuzlu və iddialı şəxslərin sayı çoxalmışdır. Təəssüf ki, bu baxışların toqquşmasında çirkin niyyətlər, düşmən təsirləri də bəzən hiss olunur və bu baxımdan niyyəti xoş olanlar ayrılaraq öz düşüncələrinə uyğun yeni təşkilat formalaşdırıb genişləndirmək, təbliğatı paralel aparmaq yolunu tutur, bəziləri isə aranı qatmaqla kimlərinsə sifarişini yerinə yetirirlər”.

Bəyanatda o da qeyd olunub ki, DAK-dan ayrılmağa məcbur olan bəzi soydaşlarımızın hazırda apardıqları təbliğat kimlərinsə əlində alət olduqları təsəvvürünü yaradır və özlərini nüfuzdan salır: “İstəklərində səmimidirlərsə və heç bir düşmən qüvvənin təsirində deyillərsə, diaspor fəaliyyətlərini davam etdirsinlər, təbliğatlarını böyük bir qurumun adının ləkələnməsi istiqamətində deyil, Azərbaycanın haqq səsini dünyaya tanıtmaq üstündə qursunlar. DAK-ın fəaliyyəti davam etdiyi halda ikinci, üçüncü eyni adlı təşkilat yaratmaq kimi anlaşılmazlıq və perspektivsiz təşəbbüslərdənsə, DAK-ın növbəti qurultayına qatılsınlar və ya başqa adla müstəqil qurum yaratsınlar”.