Avropa Azərbaycan Məktəbi məzunu, yüksək nəticəli Beynəlxalq Bakalavriat (IB) Diplom Proqramının tələbəsi Nicat Tağızadə ABŞ-ın Stanford Universitetinə qəbul olub. 43/45 IB Diplom nəticəsi göstərən Nicat Stanford Universitetində Data Elmi ixtisası üzrə təhsil alacaq.
APA xəbər verir ki, AAM-ın açıqlamasına əsasən, Nicat Tağızadənin Stanford Universitetindəki təhsilinin tam təhsil haqqını məktəb ödəyəcək. Bu dəstək məktəbin yüksək nailiyyət göstərən məzunlarının dünyanın aparıcı universitetlərində təhsil almasını dəstəkləmək məqsədilə yaratdığı Aparıcı Universitetlər üçün AAM Təqaüd Proqramı çərçivəsində həyata keçirilir.
Proqram seçilmiş tələbələrə maliyyə dəstəyi ilə yanaşı, universitet təhsili müddətində mentorluq, həmçinin AAM məzunlar şəbəkəsi vasitəsilə davamlı əlaqə imkanları təqdim edir.
AAM-dən Stanforda gedən yol
Nicat Tağızadə AAM-da məktəbəqədər yaşlarından başlayaraq 12 il təhsil alıb. Bu illər ərzində o, akademik nailiyyətlərlə yanaşı, müxtəlif beynəlxalq olimpiada, elm, robototexnika və liderlik layihələrində iştirak edib.
Nicatın sözlərinə görə, məktəbdə keçirdiyi illər onun yalnız akademik biliklərinin deyil, liderlik, açıq düşüncə, komandada işləmək və təşəbbüskarlıq kimi bacarıqlarının inkişafında da mühüm rol oynayıb. O, xüsusilə iştirak etdiyi olimpiadaların və layihələrin gələcək akademik yolunun formalaşmasına böyük töhfə verdiyini vurğulayıb.
Nicat, həmçinin, IB Diploma Proqramının Stanforda qəbul prosesində mühüm rol oynadığını qeyd edib. Onun sözlərinə görə, proqramın tələb etdiyi akademik ciddilik və universitet səviyyəsində təhsilə hazırlıq ona mürəkkəb akademik mühitə uyğunlaşmaqda kömək edib.
Nicatın akademik göstəricilərinə 1530 SAT və 8.0 IELTS nəticələri də daxildir.
Olimpiadalar, elm və beynəlxalq nailiyyətlər
Nicatın uğurları yalnız IB Diploma nəticəsi ilə məhdudlaşmır. O, məktəb illərində bir sıra beynəlxalq və milli müsabiqələrdə uğur qazanıb.
Onun nailiyyətləri arasında VILIPO, iWise və BUCE IMSEF Mathematics (BUCE IMSEF Riyaziyyat) yarışlarında gümüş medallar, National Informatics Olympiad-da (Milli İnformatika Olimpiadası) yarımfinal mərhələsi və World Scholars Cup (Dünya Alimlər Kuboku) çərçivəsində debat və esse yazısı üzrə iki qızıl medal yer alır.
Nicat həmçinin “Sabahın Alimləri” müsabiqəsində iki dəfə medal qazanaraq International Science and Engineering Fair-ə (ISEF – Beynəlxalq Elm və Mühəndislik Sərgisi) vəsiqə əldə edib.
ISEF-də o, Sistem Proqram Təminatı (Systems Software) kateqoriyasında Böyük Mükafat qazanaraq Azərbaycan tarixində bu yarışda mükafat əldə edən ikinci iştirakçı olub. AAM-ın riyaziyyat müəllimi və Olimpiada Koordinatoru Gülzar Abbasbəyli Nicatın xüsusilə 8-ci sinifdən etibarən layihə, tədqiqat və olimpiadalara ardıcıl şəkildə hazırlaşdığını, bu prosesdə isə məktəbin davamlı dəstəyinin mühüm rol oynadığını qeyd edib.
O, FIRST Global Komandası – Azərbaycanın kapitanı kimi ölkənin milli robototexnika komandasına rəhbərlik edib, həmçinin “React Right” adlı qeyri-kommersiya təşəbbüsünün təsisçisi olub. Təşəbbüs təbii fəlakətlər zamanı insanlara böhrandan əvvəl, böhran zamanı və sonrasında dəstək göstərmək üçün texnologiyalardan istifadəni hədəfləyir.
Bundan əlavə, o, Stanford Universitetinin Yay Sessiyası çərçivəsində Data Elmi və Tətbiqi Statistika üzrə, Boston Universitetinin Orta Məktəb Fəxri Proqramı çərçivəsində isə Çoxdəyişənli Analiz və Makroiqtisadiyyatın Əsasları üzrə universitet səviyyəli kurslarda iştirak edib.
Nicatın elmi fəaliyyəti də beynəlxalq səviyyədə təqdim olunub. Süni intellekt və peyk məlumatlarından istifadə etməklə meşə yanğınları riskinin proqnozlaşdırılmasına həsr olunmuş tədqiqatı beynəlxalq elmi konfransda təqdim edilib.
“Bu uğur təkcə Nicatın deyil, AAM kollektivinin də uğurudur”
Nicatın atası Dəyanət Tağızadə AAM-ın oğlunun inkişafındakı rolunu xüsusi vurğulayıb. Onun sözlərinə görə, Nicatın əldə etdiyi nəticələr həm onun şəxsi bacarıq və zəhmətinin, həm də məktəbdə yaradılmış komanda və inkişaf mühitinin göstəricisidir.
Dəyanət Tağızadə qeyd edib ki, Stanford Universitetindən qəbul aldıqdan sonra ailə gələcək planların müəyyənləşdirilməsi və qəbul prosesi ilə bağlı məktəb komandası ilə sıx əməkdaşlıq edib. Məktəb universitetə müraciət, qeydiyyat və digər texniki proseslərdə ailəyə dəstək göstərib.
Nicat özü də müsahibəsində valideynlərinin bu prosesdəki rolunu xüsusi qeyd edib. O, valideynlərinin həm maddi, həm də mənəvi baxımdan hər zaman yanında olduğunu, çətinliklər zamanı onu dəstəklədiklərini və daha yüksək hədəflərə doğru ruhlandırdıqlarını bildirib.
AAM-ın Universitetə Qəbul Məsləhət Xidmətinin dəstəyi
Nicatın Stanford Universitetinə qəbul prosesində AAM-ın Universitetə Qəbul Məsləhət Xidmətinin də mühüm rolu olub.
AAM-ın Universitet Məsləhətçisi Gülnar Quliyeva Nicatla universitetə müraciət boyunca işlədiyini və onun akademik potensialını, marağını və qətiyyətini yaxından müşahidə etdiyini bildirib. Onun sözlərinə görə, Nicatın data texnologiyalarına və problem həllinə olan marağı məktəb illərindən aydın görünürdü və Stanford onun bu marağını daha da inkişaf etdirməsi üçün uyğun mühitdir.
Gülnar Quliyeva Nicatın Stanfordda və sonrakı mərhələlərdə əhəmiyyətli töhfələr verəcəyinə inandığını və onun uğuru ilə qürur duyduğunu bildirib.
“Növbəti uğur qazanan tələbə bəlkə də siz olacaqsınız”
AAM-ın Baş İcraçı Direktoru Françesko Bankini Nicatın nailiyyətinin bütün məktəb icması üçün böyük qürur mənbəyi olduğunu bildirib.
“Nicat AAM-ın ən yüksək nəticə göstərən tələbələrindən biridir və onun Stanford Universitetində yeni təhsil mərhələsinə başlamasını böyük qürurla qarşılayırıq,” — deyə Françesko Bankini bildirib.
Onun sözlərinə görə, məktəb tərəfindən yaradılan Təqaüd Proqramı yüksək nailiyyət göstərən tələbələrin dünyanın aparıcı universitetlərində təhsil almaq arzularını reallaşdırmaq üçün uzunmüddətli dəstək mexanizmi kimi nəzərdə tutulub.
“Biz Nicata növbəti illərdə də iqtisadi dəstək göstərməklə yanaşı, məzun əlaqələri və mentorluq proqramı vasitəsilə onun yanında olacağıq. Məqsədimiz yüksək nəticə göstərən daha çox tələbənin yolunu dəstəkləməkdir. Növbəti uğur qazanan tələbə bəlkə də siz olacaqsınız,” — Françesko Bankini bildirib.
Yeni mərhələnin başlanğıcı
Nicat Tağızadə üçün Stanford Universitetinə qəbul AAM-da keçirdiyi illərin yeni mərhələyə keçidini ifadə edir. Məktəbdə formalaşan akademik baza, IB Diploma təcrübəsi, olimpiada və beynəlxalq müsabiqələrdə iştirakı, tədqiqat fəaliyyəti, liderlik təcrübəsi və Universitetə Qəbul Məsləhət Xidmətinin dəstəyi onun universitetə müraciət prosesinin əsas komponentləri arasında olub.
Nicat bu mərhələni geridə qoyarkən məktəb müəllimlərinə, rəhbərliyə, Universitetə Qəbul Məsləhət Xidməti komandasına, valideynlərinə və dostlarına təşəkkürünü bildirib.
“Avropa Azərbaycan Məktəbil ailəsinin bir hissəsi olduğum üçün çox minnətdaram və gələcək üçün həyəcanlıyam,” — deyə Nicat qeyd edib.
Stanford Universitetində Data Elmi üzrə təhsilinə başlayacaq Nicat Tağızadə üçün bu, yalnız yeni universitet həyatının başlanğıcı deyil, məktəb illərində formalaşdırdığı bilik, bacarıq və dəyərlərin daha böyük akademik mühitdə davamıdır.
Aparıcı Universitetlər üçün AAM Təqaüd Proqramı isə yüksək nailiyyət göstərən məzunların dünyanın aparıcı universitetlərində təhsil almaq imkanlarını genişləndirməyi və onların universitet illərində də məktəb icması ilə əlaqələrini davam etdirməyi hədəfləyir.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
