Hadisə

APA-nın xəbərinə görə, video materialda deputatla sabiq rektor və vasitəçi kimi təqdim olunan S. Babayeva arasında E. Abdullayevin Milli Məclisin üzvü seçilməsi üçün yüksək məbləğdə rüşvət verməsi, ondan əlavə məbləğ istənilməsi barədə dialoq əksini tapıb. Dialoqda yüksək vəzifəli şəxslərin də adı çəkilib. Video görüntünün harada və nə vaxt çəkilməsi barədə məlumat verilmir. Elşad Abdullayev görüntüləri məhz indi açıqlamasının səbəbinə də aydınlıq gətirməyib.

Xatırladaq ki, E. Abdullayev bir həftə əvvəl onda belə görüntünün olması barədə mətbuata məlumat verib, həmin görüntüləri açıqlayacağını bildirib. Dünən isə o, “Youtube” internet şəbəkəsində görüntüləri yerləşdirib.

E. Abdullayevin vəkili Adil İsmayılov yayılmış video görüntü ilə bağlı bir qədər sonra APA-ya açıqlama verəcəyini bildirib.

Millət vəkili Gülər Əhmədova isə APA-ya açıqlamasında yayılmış video görüntüyə münasibət bildirib: “ Elşad Abdullayev Fransada siyasi mühacir kimi status almaq istəyir. Bu adam əvvəldən bilirdi ki, onun rəhbərlik etdiyi universitetdə baş verənlərlə bağlı mənə kifayət qədər müraciət edənlər var. Məndə olan materialların da çoxluğundan xəbərdar idi. Bu səbəbdən onun bu hərəkəti etməsindən təəccüblənmədim”.

G. Əhmədovanın sözlərinə görə, o, eyni situasiyanı sabiq səhiyyə naziri Əli İnsanovun həbsindən sonra da yaşayıb: “ Əli İnsanov həbs olunandan sonra Elşad Abdullayev məni 3 dəfə məhkəməyə verib. O bilirdi ki, mən 2002-ci ildə uşaq alveri ilə bağlı məsələ qaldırmışdım. Bundan yayınmaq üçün ona başa salmışdılar ki, məni indidən məhkəməyə verib, ona şər atdığımı iddia etsin. Yəni bu mənim üçün ilk hadisə deyil. Bu halı bir dəfə yaşamışam. Bu da ikinci hadisədir. Mənim üçün fərqi yoxdur. Mən materialları da yayıram, göndərirəm. İndi belə etməklə özü başa saldı ki, hansı dərəcədə günahkardır. Mən güman edirdim ki, o, bəlkə camaatın pulunu qaytaracaq. Çünki evi əlindən alınan, döyülüb gözü çıxarılan, intihar edən gəlinlər olub orada. Bunların hamısını açıqlayacağıq. Elşad Abdullayev nə edirsə etsin, dəxli yoxdur”.

Deputat deyib ki, onun Elşad Abdullayevə bəzi sualları da var: “Birinci, onda bu qədər pul hardandır? Əgər bu pulları leqal biznesdən qazanıbsa, onda vergisi hanı? Orqan mafiyasının başçısı daha neyləməlidir ki?”

G. Əhmədova video görüntünü sosial şəbəkələrdə müzakirə edənlərə də mesajının olduğunu deyib: “ Sosial şəbəkələrdə özlərini həddindən artıq aktiv aparanlara bir ismarışım da var. Zamanında özünü “Xədicənin bacıları” kimi təqdim edənlərə xitab etmək istəyirəm. Onlar indi “şok oldum”, “halım dəyişdi” kimi fikirlər səsləndirirlər. Burada şok olmalı bir hal yoxdur. Bu video görüntü başdan ayağa qədər montajdır. Bu ölkədə Elşad Abdullayevin hansı rəzilliklərlə məşğul olduğunu bilməyən yoxdur. Ona görə də Elşad Abdullayev kiminlə düşmənçilik edirsə, əksinə, həmin adama dəstək vermək lazımdır”.

G. Əhmədova görüntüləri izləyib-izləməməsi, hansı hissəsinin montaj olduğu barədə suala isə belə cavab verib: “Əsəbimdən əməlli-başlı baxa bilməmişəm. Bircə başlıqları oxuya bilmişəm. Bəlkə də bu adamla rastlaşanlar bilirlər ki, bu hansı xislətdə adam olub. Dünən köməkçim dedi ki, bu xəbəri ilk yayan “azpolitika” saytı da video görüntünün montaj olduğunu yazıb. Açığı, əvvəldən axıra qədər həmin görüntüyə baxmamışam. Bütün gecəni isə bizdə olan materialları toplamışam. Ən çox baxdıqlarım sosial şəbəkələrdəki statuslar idi. Həm də özünü “süddən çıxan ağ qaşıq” kimi göstərən mətbuat orqanlarını izləmişəm. Hamı nədənsə özü haqqında olanları unudur. Çalışırlar ki, belə vəziyyətdə özlərini İsa peyğəmbər, Müqəddəs Məryəm kimi göstərsinlər. Hər halda hamı bir-birini yaxşı tanıyır və bilir ki, kim-kimdir”.

Deputat video görüntünün çəkildiyi vaxtla bağlı suala konkret cavab verməyib: “Bir ayın içində mənim 40-50 cür video və foto görüntülərim ola bilər. Bu video isə neçə il əvvəlin görüntüsüdür. Bəlkə haradasa olanda çəkilib, yaxud da montaj olunub. Bu məsələləri hələ özüm araşdırmamışam. Bunları araşdırandan sonra bu suallara bir-bir cavab verəcəyəm. Mən heç vaxt suallardan qaçmıram. Onun danışıqlarından belə başa düşürəm ki, orda deputat seçkiləri-filan deyir, qardaşı ilə bağlı danışır. Yəqin, 2000-ci illərin əvvəllərindən söhbət gedir”.

G. Əhmədova artıq prokurorluğa müraciət etdiyini və E. Abdullayevlə bağlı materialları göndərdiyini deyib.

Deputat üzvü olduğu partiyadan və Milli Məclisdən bu görüntülərə hansı reaksiyanın verildiyi barədə suala isə qısa cavab verib: “Mənə heç kim heç nə deməyib”.

Video görüntüdəki digər şəxs-Sevinc Babayeva ilə əlaqə yaratmaq isə mümkün olmayıb. Direktor işlədiyi kitabxanadan onun işdə olmadığını bildiriblər.