Hadisə

Ana səhifə

Hadisə

Xanlar Hacıyev: “Avropa Məhkəməsində Azərbaycanla bağlı 40-a qədər şikayət üzrə qərar çıxarılması gözlənilir”

11 dekabr 2008 09:41 (UTC +04:00)

APA-nın məlumatına görə, bu barədə Avropa İnsan Hüquqları Məhkəməsinin Azərbaycandan olan hakimi Xanlar Hacıyev bildirib. Onun sözlərinə görə, şikayətlərin yarısını keçmiş Azərbaycan vətəndaşları olan ermənilər edib. X. Hacıyev bildirib ki, Azərbaycandan göndərilən şikayətlər müxtəlif səpkilidir: “Daha çox ədalət mühakiməsinin həyata keçirilməsi zamanı yol verilən səhvlərlə bağlı müraciətlər var. Məhkəmə qərarlarının icra olunmaması, parlament seçkiləri zamanı yol verilən pozuntularla, mülkiyyətlə bağlı şikayətlər mövcuddur”.
X. Hacıyevin sözlərinə görə, Avropa Məhkəməsində Azərbaycanla bağlı indiyə qədər 16 qərar qəbul olunub: “Lakin hazırda Azərbaycanla bağlı şikayətləri qəbul edən hüquqşünasların sayı çoxaldığından daha çox işə baxılacaq. Hazırda məhkəmənin gündəliyində Azərbaycanla bağlı 40-a qədər şikayətə dair qərarın çıxarılacağı gözlənilir. Ölkə ilə əlaqədar nə qədər şikayət yaranırsa, sabah bu şikayətlər potensial qərara çevrilir”.
X. Hacıyev bildirib ki, hazırda Avropa Məhkəməsində Dağlıq Qarabağdan olan məcburi köçkünlərlə bağlı bir neçə şikayət var: “Onlardan biri Laçın rayonundan olan 6 nəfər azərbaycanlı ilə bağlıdır. İkisi isə ermənilərlə bağlı şikayətlərdir. Bu proses hələ davam edəcək. Bir qədər vaxt lazımdır. İndi mənə məhkəmənin hansı qərara gələcəyini demək çətindir. Məhkəmənin çıxardığı bu cür qərarlara pilot qərarlar deyirlər. Bu cür qərarların ardınca çoxlu sayda şikayətlər gələ bilər. Ona görə də belə qərarların qəbul edilməsində ehtiyat edirlər. Digər tərəfdən, problemin siyasi tərəfi də var. Ona görə də bu məsələdə hələ heç bir mövqe yoxdur”.
X. Hacıyev qeyd edib ki, Avropa Məhkəməsi siyasi təşkilat deyil və Qarabağ problemini həll edə bilməz: ”Hüquqi yolla Dağlıq Qarabağdan köçürülən insanların əmlakı və digər hüquqları ilə bağlı məsələlərə baxıla bilər. Ancaq belə müraciətlər fərdi qaydada edilməlidir”.