Hadisə

Ana səhifə

Hadisə

Məcidova bacılarının qətli ilə bağlı məhkəmə prosesində Dəvəçi rayon polis şöbəsinin rəis müavini Məmmədmusa Hüseynov ifadə verib

11 dekabr 2008 14:57 (UTC +04:00)

Bakı. Ramil Məmmədli - APA. Bu gün Ağır Cinayətlərə Dair İşlər üzrə Məhkəmədə hakim Əhməd Quliyevin sədrliyi ilə Dəvəçi rayonunun Dağ Bilici kənd sakinləri Nailə və Reyhanə Məcidova bacılarını qətlə yetirməkdə təqsirləndirilən Qələgah kənd sakinləri - Təvəkkül, Elnur və Elçin İsmayılov qardaşlarının cinayət işi üzrə növbəti məhkəmə prosesi keçirilib.

APA-nın məlumatına görə, prosesdə əlavə şahid kimi dəvət olunan Dəvəçi rayon polis şöbəsinin rəis müavini Məmmədmusa Hüseynov ifadə verib. Prokurorun, təqsirləndirilənlərin, zərərçəkənlərin və hakimlərin suallarını cavablandıran M. Hüseynov deyib ki, T. İsmayılovu rayon sakini tanıyır və onunla hər hansı bir əməkdaşlığı olmayıb. O, özü haqda məhkəmədə və mətbuatda deyilənləri təkzib edərək bildirib ki, hadisə törədilən zaman iş yerində olub və itkin düşən bacıların axtarışı ilə bağlı əməliyyat qrupuna rəhbərlik edib. M. Hüseynov 2005-ci ildə itkin düşən Dilafruz Daşdıyeva ilə də bağlı məhkəməni maraqlandıran sualları cavablandırıb. M. Hüseynov rayonda ona qarşı qərəzli mövqedə şəxslərin olduğunu da söyləyib: “Bununla bağlı Daxili İşlər Nazirliyinin rəhbərliyinə və Baş Prokurorluğa məlumat vermişəm. Yaxın vaxtlarda həmin şəxslər haqqında məhkəməyə müraciət edəcəyəm”.

Təqsirləndirilənlər isə M. Hüseynovun ifadəsində həqiqətə uyğun olmayan məqamların çoxluq təşkil etdiyini bildiriblər. T. İsmayılov deyib ki, Məcidova bacılarının və D. Daşdıyevanın oğurlanmasında M. Hüseynov maraqlı olub: “Avqustun 8-də sən mənə dedin ki, al boynuna, Bayram müəllimi də, Zamir Məcidovu da həbs etdirim”. Prosesdə D. Daşdıyevanın anası Hürü Daşdıyeva da polis rəisinin müavinin ifadəsinə öz etirazını bildirib. Zərərçəkən tərəf Baş Prokurorluğun Ağır Cinayətlərə Dair İşlər üzrə İstintaq İdarəsinin müstəntiqi Zakir Saatovun da əlavə şahid qismində məhkəməyə çağırılması barədə vəsatət qaldırıb. Məhkəmə bu vəsatəti qəbul etməyərək, növbəti məhkəmə prosesini dekabrın 18-ə təyin edib.

Qeyd edək ki, Təvəkkül, Elnur və Elçin İsmayılov qardaşları Dəvəçi rayonunun Dağ Bilici kənd sakinləri Nailə və Reyhanə Məcidova bacılarını qətlə yetirməkdə ittiham olunurlar. İttiham aktında Cinayət Məcəlləsinin 120.1-ci (qəsdən adam öldürmə), 149-cu (zorlama), 150.2.3-cü (azyaşlı şəxsə qarşı seksual xarakterli əməllər törətmə), 127. 1-ci (qəsdən sağlamlığa az ağır zərər vurma), 144.3-cü (adam oğurluğu), 177-ci (oğurluq), 178-ci (dələduzluq) və 221-ci (qanunsuz olaraq odlu silah, onun hissələrini hazırlama, saxlama, satma, daşıma, göndərmə) maddələri ilə ittiham olunan İsmayılov qardaşlarının ötən ilin avqustunda Məcidova bacılarını öldürdükdən sonra Samur-Abşeron kanalına atdıqları göstərilib. N. Məcidovanın meyiti ötən il avqustun 9-da Samur-Abşeron kanalının Siyəzən istiqamətində aşkarlanıb. R. Məcidovanın meyiti isə indiyədək tapılmayıb.