Hadisə

Ana səhifə

Hadisə

Heydər Əliyevə sui-qəsd etməyə cəhd göstərmiş Türkiyə vətəndaşı 30 il həbsə məhkum olunub

30 iyun 2009 15:47 (UTC +04:00)

APA-nın “Hürriyet” qəzetinə istinadən verdiyi məlumata görə, H. Toku İstanbulun Bakırköy rayonu 5-ci Ağır Cəza Məhkəməsinin qərarı ilə əvvəlcə ömürlük həbsə layiq görülüb, ancaq məhkəmə prosesindəki davranışları nəzərə alınaraq bu cəza 30 illik həbslə əvəzlənib. Azadlıqda ola-ola məhkəməsi gedən H. Toku qərardan apellyasiya şikayəti verəcəyini açıqlayıb: “Ədalətin zəfər çalacağına inanıram. Əməlimdən çox peşmanam. Şikayətim rədd edilərsə, Avropa İnsan Haqları Məhkəməsinə müraciət edəcəyəm. Çünki mən cinayət törədiyim ölkədə cəzamı çəkmişəm. Heydər Əliyevin əfv fərmanı ilə azadlığa buraxılmışam. Ancaq beynəlxalq hüquqdakı “bir şəxs eyni cinayətə görə iki dəfə mühakimə edilib cəzalandırıla bilməz” prinsipi Türkiyədə nəzərə alınmadı. Əliyev məni əfv etdi, amma Türkiyə əfv etmədi. Halbuki bu gün vətən torpaqlarını parçalamağa çalışan terrorçular, PKK-çılar da əfv edilir”.

Qeyd edək ki, 40 yaşlı H. Toku 1993-cü il sentyabrın 30-da Heydər Əliyevə sui-qəsd etməyə hazırlaşarkən Azərbaycan Dövlət Televiziya və Radio Şirkətinin qarajında yaxalanıb. O, məhkəmənin hökmü ilə 10 il müddətinə azadlıqdan məhrum edilib. 8,5 il həbsdə qalan H. Toku 2002-ci il martın 13-də prezident Heydər Əliyevin fərmanı ilə əfv edilərək azadlığa buraxılıb. Martın 16-da Türkiyəyə gedən H. Toku İstanbulun Atatürk hava limanında polis tərəfindən saxlanılsa da, barəsində həbs qətimkan tədbiri seçilməyib və sərbəst buraxılıb. Ancaq 2006-cı ildə ədliyyə naziri Cəmil Çiçəyin icazəsi ilə H. Toku haqında “xarici ölkənin başçısına sui-qəsd” ittihamı ilə cinayət işi qaldırılıb. 2009-cu il iyunun 24-də keçirilən son məhkəmə prosesində 30 il müddətinə azadlıqdan məhrum edilib.