İncəsənət

Ana səhifə

İncəsənət

Azərbaycan musiqiçiləri Qahirədə V Səma Beynəlxalq Musiqi festivalında iştirak ediblər

09 avqust 2012 17:57 (UTC +04:00)

Bakı-APA. 29 iyul - 8 avqust tarixlərində Qahirədə keçirilən V Səma Beynəlxalq Musiqi festivalında Azərbaycan Respublikasını kamança ustası və müğənni Mehri Əsədullayeva və onu müşayiət edən truppa təmsil edib. Bu barədə APA Azərbaycanın Misirdəki səfirliyinə istinadən məlumat verir.

Festivalda Azərbaycan ilə bərabər, Türkiyə, ABŞ, Fransa, Çin, Hindistan, İraq, Pakistan, Ukrayna, Yəmən, İspaniya, Ekvador, Zambiya, Bosniya-Herseqovina, İndoneziya və digər dövlətlər təmsil olunublar.

Ramazan ayı müddətində keçirilən Səma musiqi festivalı Misirdə və Yaxın Şərq regionunda ən böyük miqyaslı və nüfuzlu festivallardan biri hesab olunur.

Festival çərçivəsində Mehri Əsədullayeva Misirin “Məhəmməd Əli” və “Əl-Quturi” kimi möhtəşəm saraylarında keçirilən konsert proqramlarında çıxış edərək, incə və zərif Azərbaycan musiqisi parçaları vasitəsilə tamaşaçıların qəlbini oxşayıb.

Festivalın rəhbəri tərəfindən “dünyanın ən istedadlı qadın kaman ustası” kimi təqdim olunan Mehri Əsədullayevanın kaman ifası tamaşaçılar tərəfindən xüsusi diqqətlə izlənib.

Festival çərçivəsində 8 avqust tarixində “Bütün dünyaya sülh” adı altında keçirilən son konsertdə Azərbaycan musiqisinin festivalda iştirak edən digər ölkələrin musiqisi ilə həmahəng təqdimatı tamaşaçılar tərəfindən xüsusi maraq və sevgi ilə qarşılanıb.

Festival və Azərbaycan sənətkarlarının ifası Misirin kütləvi informasiya vasitələri tərəfindən geniş şəkildə işıqlandırılıb.