Bakı. Nicat Mustafayev – APA-Economics. «Azerspace-1» telekommunikasiya peykinin istehsalı ilə bağlı imzalanmış müqavilənin tələblərinə uyğun olaraq, peykin istehsalı ilə bağlı işlər planlaşdırılmış qaydada həyata keçirilir.
«Azərkosmos» ASC-dən «APA-Economics»ə verilən məlumata görə, artıq peykin istehsalı tamamlanıb və hazırda peyk son zavod testləri mərhələsindədir.
«Azerspace-1» peykinin nəzərdə tutulan tarixdə orbitə çıxarılması istiqamətində lazımi tədbirlər peykin istehsalçısı olan ABŞ-ın «Orbital Sciences» şirkəti və peykin raketdaşıyıcısının istehsalçısı olan Fransanın «Arianespace» şirkəti ilə müəyyən edilmiş qrafikə uyğun şəkildə həyata keçirilir.
Peykin son sınaq yoxlamaları dekabrın 5-dək yekunlaşacaq və peyk buraxılış üçün tam hazır vəziyyətə gətiriləcək. Daha sonra, peyk 2013-cü ilin yanvar ayında Cənubi Amerikada yerləşən Fransanın Qviana Kosmik Mərkəzinin Kuru kosmodromuna aparılacaq. Peykin gözlənilən tarixdə, 2013-cü ilin fevralın birinci dekadasında geostasionar orbitə çıxarılması planlaşdırılır.
«Orbital Sciences Corporation» şirkətinin zavodunda peykin istehsalına nəzarət edən «Azərkosmos» ASC-nin bir əməkdaşı və peykin istehsalına texniki nəzarəti həyata keçirən Kanadanın «Telesat» məsləhətçi şirkətinin iki əməkdaşı peykin sınaq yoxlamaları prosesini yaxından izləyir.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
