APA-nın məlumatına görə, bu barədə ölkə prezidenti İlham Əliyevin dünən imzaladığı “Azərbaycan dilinin qloballaşma şəraitində zamanın tələblərinə uyğun istifadəsinə və ölkədə dilçiliyin inkişafına dair Dövlət Proqramı”nda nəzərdə tutulub.
Proqrama əsasən, xaricdən idxal olunan məhsulların üzərində Azərbaycan dilində məlumatların olmasına nəzarət İqtisadi İnkişaf Nazirliyi, Dövlət Gömrük Komitəsi və Standartlaşdırma, Metrologiya və Patent üzrə Dövlət Komitəsi tərəfindən həyata keçiriləcək.
Bununla yanaşı, Azərbaycan dilinə daxil olan yeni elementlərin öyrənilməsi, sistemləşdirilməsi və tətbiqinin genişləndirilməsi ilə bağlı tədbirlər də həyata keçiriləcək. Ölkədə tədrisin digər dillərdə aparıldığı ümumtəhsil müəssisələrində dövlət dili tədris olunacaq. Bu işin həyata keçirilməsi AMEA və Təhsil Nazirliyinə həvalə olunub. Həmçinin ölkədə qədim dünya dillərinin və qədim mədəniyyətlərin öyrənilməsi üçün yeni layihələr hazırlanacaq. 2013-2020-ci illər ərzində türk dillərinin fonetika, leksika və qrammatikasının müqayisəli tədqiqi sahəsində işlərin intensivləşdirilməsi, ortaq əlifba, terminologiya və ədəbi dillə bağlı birgə layihələrin hazırlanması AMEA və Təhsil Nazirliyinə həvalə olunub.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
