Maliyyə

Ana səhifə

Maliyyə

«AFB Bank» milli valyutanın kotirovkalarını «Reuters Trader» platformasına daxil edib

21 aprel 2010 13:28 (UTC +04:00)

Bakı. Elnur Hüseynquluyev – APA-Economics. Azərbaycanın «AFB Bank» ASC ilk dəfə olaraq «Reuters» agentliyi vasitəsi ilə Milli valyutada (AZN) kommersiya məlumatlarını dünya ictimaiyyətinə təqdim edib.
Bankın baş ofisindən «APA-Economics»ə verilən məlumata görə, «Reuters Trader» platformasında Azərbaycan manatında (kod - AZN) real rejimdə kotirovkalar təqdim olunur. Bu addım manat valyutasına dair dəqiq və yenilənən informasiyanın maliyyə qurumlarına və «Reuters» istifadəçisi olan digər qurumlara çatdırılmasını nəzərdə tutur.
Həmçinin, bunun sayəsində «AFB Bank» avro, dollar, funt sterlinq, rubl və türk lirəsinin manata qarşı alış-satış məzənnəsinin müəyyənləşdirilməsi imkanı yaranacaq. Bundan başqa, avro, dollar və manatla növbəti 1 il müddətinə kredit və depozitlər üzrə faiz dərəcələri əks olunacaq.
Bankın Müşahidə Şurasının sədri Emre Timurkanın sözlərinə görə, «AFB Bank» Azərbaycanda ilk və yeganə bankdır ki, bu növ xidmət göstərir və valyutaların kotirovkalarını real rejimdə təqdim edir. «Bu xidmətin tətbiq edilməsi bankımızın beynəlxalq fokus və müştəriyə yönəlik biznes modelinin göstəricisidir», - deyə E.Timurkan qeyd edib.
Qeyd edək ki, «AFB Bank» ASC bank fəaliyyəti ilə bağlı lisenziyanı Azərbaycan Mərkəzi Bankı tərəfindən 2008-ci ilin noyabrın 30-da alıb. Bu ilin fevral ayından bank rəsmi fəaliyyətə başlayıb.