Maliyyə

Ana səhifə

Maliyyə

«Unibank»ın əsas maliyyə göstəriciləri kəskin azalıb

26 aprel 2010 11:36 (UTC +04:00)

Bakı. Elnur Hüseynquluyev - APA-Economics. Azərbaycanın «Unibank» ASC-nin aktivlərinin həcmi 2010-cu ilin aprel ayının 1-nə 347,378 mln. manat təşkil edib ki, bu da 2009-cu ilin aprelin 1-nə olan göstəricisinə nisbətən 7,2% azdır.

Bankın baş ofisindən «APA-Economics»ə verilən məlumata görə, hesabat dövründə bankın depozit portfeli 63,3% genişlənərək 145,873 mln. manata, o cümlədən əhalinin əmanətləri 79,6% artaraq 112,155 mln. manata çatıb. Eyni zamanda bankın kredit portfeli 23% azalaraq 220,705 mln. manat, o cümlədən istehlak kreditlərinin həcmi 23,3% azalaraq 93,093 mln. manat olub.

Bu müddət ərzində bankın məcmu kapitalı 17,2% azalaraq 57,075 mln. manat, o cümlədən nizamnamə kapitalı iki dəfə artaraq 30 mln. manat təşkil edib.

Qeyd edək ki, son bir ildə bankın gəlirləri 31% azalaraq 10,845 mln. manat, xərcləri isə 18,2% azalaraq 10,787 mln. manat olub. Nəticədə bankın mənfəəti 42,6 dəfə azalaraq 57,83 min manat təşkil edib. Bu dövrdə bankın müştərilərinin sayı 7% azalaraq 127 215, o cümlədən fiziki şəxslərin sayı 5,7% azalaraq 123 649, hüquqi şəxslərin sayı isə 36,6% azalaraq 3 566 olub. Bankın işçilərinin sayı 8,7% artaraq 585 nəfər, orta aylıq əmək haqqı isə 6% artaraq 1 080 manat təşkil edib.

Xatırladaq ki, «Unibank» ASC 1992-ci ildən fəaliyyət göstərir. Cari ilin aprelin 1-nə bankın 25 filialı, 64 bankomatı və 244 POS-terminalı fəaliyyət göstərir.