Maliyyə

Ana səhifə

Maliyyə

Azərbaycan Maliyyə Monitorinqi Xidmətinin direktoru Adışirin Qasımov: «Dövlətlərarası əməkdaşlığın gücləndirilməsi vacibdir»

17 fevral 2011 08:20 (UTC +04:00)

Bakı. Əli Əhmədov - APA-Economics. Azərbaycan 2000-ci ildən etibarən pulların leqallaşdırılması və terrorçuluğun maliyyələşdirilməsinə qarşı beynəlxalq çağırışlara qoşulub, 2002-ci ildən etibarən Avropa Şurasının MONEYVAL Komitəsində təmsil olunmaqla beynəlxalq əməkdaşlıq edir.

«APA-Economics»in xəbərinə görə, bunu Azərbaycan Mərkəzi Bankı yanında Maliyyə Monitorinqi Xidmətinin direktoru Adışirin Qasımov bu gün Bakıda işə başlayan «Cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizə sahəsində I Bakı Regional Konfransı»nda çıxış edərkən bildirib.

Onun sözlərinə görə, Azərbaycan prezidenti tərəfindən təsdiqlənmiş «Şəffaflığın artırılması və korrupsiyaya qarşı mübarizə üzrə Milli Strategiya»nın hədəflərindən biri də ölkədə beynəlxalq standartlara uyğun pulların leqallaşdırılması və terrorçuluğun maliyyələşdirilməsinə qarşı mübarizə sisteminin formalaşdırılmasıdır.

A.Qasımov qeyd edib ki, 2009-cu ildə ölkədə beynəlxalq standartlara uyğun qanunvericilik bazası formalaşdırılıb, bu sahədə yeni institut - Mərkəzi Bank yanında Maliyyə Monitorinqi Xidməti (MMX) yaradılıb. MMX tərəfindən cinayət yolu ilə əldə edilmiş pulların yuyulması və terrorçuluğun maliyyələşdirilməsinə qarşı mübarizə potensialının artırılması məqsədilə 2010-2013-cü illər üçün Strategiya qəbul edilib.

«Pulların yuyulması və terrorçuluğun maliyyələşdirilməsinə qarşı mübarizə narkotik maddələrin ticarəti, insan alveri və terror aktlarının maliyyələşdirilməsi kimi sosial təhlükələrin azaldılması, başqa sözlə, insanlığa qarşı cinayətlərin qarşısının alınması kimi mühüm əhəmiyyətə malikdir. Kriminal və terrorçu qruplar milli və beynəlxalq maliyyə sistemlərindəki boşluqlardan istifadə edir, aşkarlanmaqdan yayınmaq üçün əməliyyat üsullarını tez-tez dəyişirlər. Hər hansı bir cinayət və tipologiyaların müvafiq nümunələri aşkar olunanadək cinayətkarlar yeni üsullara və coğrafi regionlara keçirlər. Məhz buna görə də ölkələr arasında əməkdaşlığın gücləndirilməsi vacib şərtdir», - deyə A.Qasımov bildirib.