Maliyyə

Ana səhifə

Maliyyə

«Paşa Həyat Sığorta» şirkəti fəaliyətə başladığı ilk üç gün ərzində 20-dən artıq müqavilə bağlayıb

17 fevral 2011 09:08 (UTC +04:00)

Bakı. Elnur Hüseynquluyev – APA-Economics. Azərbaycanın «Paşa Həyat Sığorta» şirkəti fəaliyətə başladığı ilk üç gün ərzində «İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta» növü üzrə 20-dən artıq sığorta müqaviləsi bağlayıb. Bunu «APA-Economics»ə açıqlamasında şirkətin İdarə Heyətinin sədri Mürsəl Rüstəmov bildirib.

M.Rüstəmovun sözlərinə görə, hazırda bu sığorta növü üzrə şirkətə müraciət edən müəssisə və təşkilatların sayı çoxdur: «Hazırda həmin müraciətləri araşdırırıq. Bağlanmış sığorta müqavilələrinin dəyəri isə yaxın vaxtlarda açıqlanacaq. Hazırda bizim şirkət yalnız bir sığorta növü üzrə («İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta») fəaliyyət göstərir. Strateji plana uyğun olaraq bu il ərzində daha iki növün - «Həyatın yaşam sığortası» və «Kredit götürən şəxsin həyat sığortası» növlərinin tətbiqinə başlanılacaq».

Qeyd edək ki, «Paşa Həyat Sığorta» sığorta şirkəti 2010-cu ilin noyabr ayının 24-də dövlət qeydiyyatına alınıb, sığorta fəaliyyətinə lisenziya (5 illik) isə bu ilin fevral ayının 14-də verilib. Şirkətin İdarə Heyətinin sədri Mürsəl Rüstəmov, İdarə Heyətinin üzvü Niyazi İsmayılov, Təftiş Komissiyasının sədri isə Ülviyyə Cabbarovadır. Cari ilin fevral ayının 1-nə şirkətin nizamnamə kapitalı 7 mln. manat təşkil edir.