Maliyyə

Ana səhifə

Maliyyə

Azərbaycan Beynəlxalq Bankının Məlumat Mərkəzinə 15 minə yaxın müraciət daxil olub

01 may 2012 13:34 (UTC +04:00)

Bakı. Vahab Rzayev - APA-Economics. Son 7 ay ərzində Azərbaycan Beynəlxalq Bankının (ABB) Məlumat Mərkəzinə 15 minə yaxın müraciət daxil olub. Bankın mətbuat xidmətindən “APA-Economics”ə verilən məlumata görə, ABB Məlumat Mərkəzi irimiqyaslı fəaliyyətə 2011-ci ilin oktyabr ayından başlayıb.

Mərkəz texniki imkanlarına görə müştəriləri və potensial müştəriləri bankla bağlı müxtəlif mövzularda - bankın məhsul və xidmətləri, xidmət şəbəkəsi, cari kampaniyalar və s. haqda məlumatlandırır. Burada yaradılan “Call-Center” xidməti vasitəsilə müraciətlərin 8018-i operator tərəfindən, qalanı isə günün 24 saatı ərazində fəaliyyət göstərən İnteraktiv Səsli Cavablama (İVR - İnteractive Voice Response), yəni elektron operator tərəfindən cavablandırılıb. Hazırda Mərkəzə daxil olan müraciətlərin sayı günbəgün artmaqdadır. Müqayisə üçün qeyd etmək olar ki, mərkəzə daxil olan müraciətlərin sayı oktyabr ayına nisbətən aprel ayında 2,4 dəfə artıb.

Aprel ayının sonuna olan statistikaya görə, operator tərəfindən qəbul olunan ümumi müraciətlərin 27,4%-i bank kartları, 25,8%-i əmanətlər, 10,4%-i hesab haqqında, 9%-i xidmət şəbəkəsi, 6,9%-i kredit məhsulları, 5,4%-i elektron bankçılıq, 5,3%-i pul köçürmələri, 4,6%-i hesabların açılması ilə əlaqədar mövzuları əhatə edib.

Məlumat Mərkəzinin yaradılması ilə müştərilərə göstərilən xidmət səviyyəsini yüksəltməklə müştəri-bank münasibətlərinin daha sıx şəkildə qurulması, müştərilərin tələbatlarını vaxtında müəyyən edərək bankın məhsul və xidmətlərini daha da təkmilləşdirmək, yenilərini yaratmaq, bununla da müştərilərin bank əməliyyatlarının aparılmasında rahatlığını təmin etmək ABB qarşısında duran əsas hədəflərdən biridir.

Eyni zamanda ABB Məlumat Mərkəzi müştərilər tərəfindən yaranan sualların dərhal cavablandırılması və müştərilərin xidmət alma rahatlığını düşünərək bankın internet səhifəsində xüsusi elektron poçt ünvanı [email protected] yaradılıb ki, bu da müştərilərə ölkənin, hətta dünyanın istənilən yerindən bütün növ bank xidmətləri və məhsulları barədə məlumat alma imkanı qazandırır. Bu isə xaricdə yaşayan və bankla əməkdaşlıq qurmaq istəyən potensial müştərilər üçün ən əlverişli vasitələrdən biridir.

Məlumat Mərkəzi layihəsi çərçivəsində bankın fəaliyyəti, xidmətlərin səviyyəsi və ya bankın məhsulları barədə təklif və ya iradları olanlar üçün də xüsusi bölmə ayrılıb. Belə ki, Məlumat Mərkəzinə zəng edib müvafiq bölməni seçərək müştəri özü barədə qısa məlumat verdikdən sonra təklif və ya iradlarını sistemin yaddaşına göndərə bilər. Sistem yaddaşına köçürülən təklif və ya iradlar mərkəzin əməkdaşları tərəfindən dərhal araşdırılır.

Həmçinin bank müştərilərə Məlumat Mərkəzinə zəng edərək operatora qoşulmaqla hesabları haqqında məlumat əldə etmək imkanı yaradıb. Bu xidmətdən istifadə etmək üçün müştəri ona xidmət göstərən ABB-nin filial və ya şöbəsinə yaxınlaşaraq müvafiq formanı doldurmalıdır. Bundan sonra müştəri telefon vasitəsilə eyniləşdirilməsi üçün istifadə edilən 6 rəqəmli “TPIN” kodla (Telephone Personal Identification Number) təmin edilir. Bu xidmət pulsuzdur.

Qeyd edək ki, müştərilər həftənin bütün günləri 24 saat ərzində stasionar telefonlardan (012) 437-79-00 və mobil operatorlardan (“Azercell”, “Bakcell” və “Narmobile-Azerfone”) *2265 (*BANK) nömrəsinə zəng edərək Məlumat Mərkəzinə qoşula bilərlər.