Maliyyə

Ana səhifə

Maliyyə

Azərbaycan sığorta bazarı son bir ildə 75% artıb

21 may 2012 13:33 (UTC +04:00)

Bakı. Elnur Hüseynquluyev – APA-Economics. Cari ilin yanvar-aprel aylarında Azərbaycanda fəaliyyət göstərən sığorta təşkilatları tərəfindən toplanan sığorta haqlarının ümumi həcmi 115,770 mln. manat təşkil edib ki, bu da ötən ilin müvafiq dövrünün göstəricisi ilə müqayisədə 75% çoxdur.

Maliyyə Nazirliyindən «APA-Economics»ə verilən məlumata görə, bu müddət ərzində həyat sığortası üzrə daxilolmaların həcmi 4,9 dəfə artaraq 5,663 mln. manat, qeyri-həyat sığortası üzrə 53% artaraq 71,059 mln. manat, icbari sığorta növləri üzrə isə 2,1 dəfə artaraq 39,048 mln. manat olub.

Daxilolmaların strukturunda ən çox sığorta haqqı «Tibbi sığorta» (35,566 mln. manat), «Avtonəqliyyat vasitəsi sahiblərinin mülki məsuliyyətinin icbari sığortası» (19,974 mln. manat), «Avtonəqliyyat vasitələrinin könüllü sığortası» (16,217 mln. manat), «İstehsalatda bədbəxt hadisələr və peşə xəstəlikləri nəticəsində əmək qabiliyyətinin itirilməsi hallarından icbari sığorta» (10,936 mln. manat) və «Əmlakın yanğından və digər risklərdən sığortası» (8,578 mln. manat) növləri üzrə toplanıb. Bu növlərin məcmu sığorta haqlarında payı müvafiq olaraq 31%, 17,3%, 14%, 9,4% və 7,4% təşkil edib.

Hesabat dövründə sığorta hadisələri üzrə ödənişlərin ümumi həcmi 50% artaraq 26,465 mln. manata çatıb. Həyat sığortası üzrə ödənilən vəsaitlərin həcmi 4,8 dəfə artaraq 0,227 mln. manata, qeyri-həyat sığortası üzrə ayrılan vəsaitlər 57% artaraq 23,100 mln. manata, icbari sığorta növləri üzrə isə 7,6% artaraq 3,138 mln. manata çatıb.

Ödəmələrdə ən çox vəsait «Tibbi sığorta» (12,142 mln. manat və ya 46%), «Avtonəqliyyat vasitələrinin sığortası» (6,725 mln. manat və ya 25%) və «Hərbi qulluqçuların dövlət icbari şəxsi sığortası» (2,264 mln. manat və ya 8,6%) növləri üzrə ödənilib.

Qeyd edək ki, Azərbaycanda 28 sığorta təşkilatı fəaliyyət göstərir.