MDB

Ana səhifə

MDB

Dmanisidə gürcü və azərbaycanlı müəllimlərlə görüş keçirilib

09 oktyabr 2009 02:12 (UTC +04:00)

Dmanisi. Nizami Məmmədzadə - APA. Dmanisidə rayon maarif sistemində çalışan gürcü və azərbaycanlı müəllimlərlə görüş keçirilib.
APA-nın Gürcüstan bürosunun xəbərinə görə, tədbiri Dmanisi rayon təhsil resursları mərkəzinin rəhbəri Yekaterina Okruaşvili açıb. Dmanisi rayon İcra Hakimiyyətinin başçısı Bakur Mqeladze prezident təqaüdçüsü olan 5 qabaqcıl müəllimə prezident təqaüdü almaq üçün sertifikatlar təqdim edib. Təqaüd alan soydaşlarımızdan Aşağı Oruzman kənd orta məktəbinin direktoru İslam Məmmədov müəllimlərə ayrılan təqaüd üçün Gürcüstanın dövlət başçısına minnətdarlığını ifadə edib.
Tədbirdə gürcü və Azərbaycan dilli məktəblərdə çalışan qocaman müəllimlərə qiymətli hədiyyələr təqdim edilib. Dmanisidə çalışan azərbaycanlı müəllimlərdən Təhminə Ömərova (Azgəyliyən kəndi), Fənurə Məmmədova (Qızılkilsə kəndi), Fəridə Almazova (Dağ Arxılı kəndi), Misirxan Yusifov (Aşağı Oruzman kəndi) və Ənvər Süleymanov (Yaqublu kəndi) da qiymətli mükafat alanlar sırasında olublar.
Tədbirin sonunda gürcü və azərbaycanlı şagirdlər tərəfindən müəllimlərin şərəfinə konsert verilib.