MDB

Ana səhifə

MDB

Gürcüstan parlamentinin binası qarşısında müxalifətin mitinqi keçirilir

28 sentyabr 2007 15:26 (UTC +04:00)

Mitinqin əvvəlində sentyabrın 27-də həbs olunmuş sabiq müdafiə naziri İrakli Okruaşvilinin öz vəkili vasitəsilə göndərdiyi müraciət oxunub. İ. Okruaşvili ona göstərilən dəstəyə görə mitinq iştirakçılarına minnətdarlığını bildirib: “Bütün ömrüm boyu mən səmimi olaraq öz xalqıma və dövlətimə xidmət etmişəm. Yeganə arzum ölkənin və millətin birləşdirilməsi olub. Təəssüf ki, qorxaq Saakaşvili bu arzumuzu əlimizdən alıb”. Onun fikrincə, xalq zəif və mənfur prezidentin əlində hansı təhlükələrlə üz-üzə olduğunu anlamalıdır: “Sizdən yalnız bunu xahiş edirəm birləşin, birləşin və öz hüquqlarınız, tiranın hakimiyyətindən xilas olmaq uğrunda bütün qanuni metodlarla mübarizə aparın. Mən də sizinlə birlikdə bu mübarizənin işindəyəm. Biz 2003-cü ildə gecə-gündüz, yağış altında mübarizə apararkən bu cür Gürcüstan və bu cür hökumət arzulamırdıq”. İ. Okruaşvili ona qarşı irəli sürülən ittihamları tamamilə yalan adlandıraraq bildirib ki, bu ittihamlarla bağlı özünə bəraət qazandırmağa çalışmayacaq, çünki bunu alçaldıcı hesab edir. Keçmiş nazirin yaratdığı “Vahid Gürcüstan Naminə” Partiyasının üzvü, deputat Konstantin Quntsadze mitinqdəki çıxışında bəyan edib ki, etiraz aksiyaları bütün ölkəni əhatə edəcək.
Qeyd edək ki, parlamentin binası qarşısındakı 9 aprel parkına dəyənəklə silahlanmış polis qüvvələri cəmləşdirilib. /APA/